30–ամյա երիտասարդի մոտ 40 փաթեթ թմրանյութ է հայտնաբերվել (ՎԻԴԵՈ)

ԵՐԵՎԱՆ, 22 փետրվարի./Նովոստի–Արմենիա/. Փետրվարի 15-ին ոստիկանության Մուշի բաժնի քրեական հետախույզները Գյումրիի Երևանյան խճուղում հայտնաբերել, ապօրինի թմրանյութ պահելու և օգտագործելու կասկածանքով ձերբակալել և Մուշի բաժին են տեղափոխել 30-ամյա մի երիտասարդի, հաղորդում է ՀՀ ոստիկանությունը:

Նրա խուզարկությամբ հայտնաբերվել է պոլիէթիլենային տոպրակ՝ մեթամֆետամինի նմանվող զանգվածով, և 39 փաթեթ՝ մեթամֆետամինի և մարիխուանայի նմանվող զանգվածներով՝ ընդհանուր 40 գրամից ավելի քաշով: Երիտասարդը հայտնել է, որ հայտնաբերվածը թմրանյութ է, ձեռք է բերել տելեգրամյան ալիքով:

Կազմված փաստաթղթերը և ձերբակալվածը ներկայացվել են Շիրակի մարզային քննչական վարչություն:

Ծանուցում. ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:–0–