ԵՐԵՎԱՆ, 21 մայիսի./Նովոստի–Արմենիա/.ՀՀ քննչական կոմիտեի Երևանի քննչական վարչության Մալաթիա-Սեբաստիա վարչական շրջանի քննչական բաժնում հարուցվել է քրեական գործ՝ 24-ամյա երիտասարդի ինքնասպանության փորձ կատարելու դեպքի առթիվ։
ՀՀ ՔԿ մամուլի ծառայության հաղորդմամբ` 2016 թվականի մայիսի 20-ին` ժամը 17:00-ին, «Աստղիկ» բ/կ-ից ահազանգ է ստացվել, որ Շահումյան փողոցից գլխի հրազենային վնասվածքով իրենց մոտ է տեղափոխվել 1992թ. ծնված Դավիթ Թովմասյանը:
Դեպքի վայրի զննության ընթացքում, Երևան քաղաքի Շահումյան փողոցի տներից մեկի նախասրահից, հայտնաբերվել է «ՊՍՄ ՌԳ 1015 Պ» համարի ատրճանակ՝ թվով 6 փամփուշտներով, մեկ գնդակ և պարկուճ` արնանման հետքերով:
Դեպքի առթիվ մայիսի 20–ին Մալաթիա-Սեբաստիա վարչական շրջանի քննչական բաժնում հարուցվել է քրեական գործ ՀՀ քրեական օրենսգրքի 110-րդ հոդվածի 1-ին մասով:
Նախաքննության ընթացքում հարցաքննվել են տուժածի մերձավոր ազգականները։
Նախնական տվյալներով՝ մայիսի 20–ին ժամը 17-ի սահմաններում, հարազատները տանը գտնվելու ժամանակ լսել են կրակոցի ձայն, դուրս եկել և տան հետնամասում, գետնին ընկած, տեսել Դավիթ Թովմասյանին՝ արնաշաղախ վիճակում, որից հետո զանգահարել են շտապօգնություն և նրան տեղափոխել են հիվանդանոց:
Նշանակվել են դատաբժշկական, դատակենսաբանական, դատահետքաբանական, դատաձգաբանական, դատագենետիկական և դատամատնադրոշմային համալիր փորձաքննություններ:
Նախաքննությունը շարունակվում է:–0–
