15–ամյա երեխան շպրտվել է. տեսախցիկը ֆիքսել է Երևանում տեղի ունեցած սարսափելի ավտովթարը (ՎԻԴԵՈ)
14:31
21 Փետրվարի 2023
ԵՐԵՎԱՆ, 21 փետրվարի./Նովոստի–Արմենիա/. Տեսախցիկն արձանագրել է, թե ինչպես է Երևանում, ժողովրդին հայտնի Փարաքարի ճանապարհին, Cadillac-ը բախվում Opel-ին, Opel-ն էլ վրաերթի է ենթարկում 15-ամյա տղային։
Shamshyan.com–ի հաղորդմամբ, պարզվել է, որ Opel-ը վարել է Երևանի բնակիչ 57-ամյա Ա. Մելիքսեթյանը, Cadillac-ը վարել է Արմավիրի մարզի բնակիչ 26-ամյա Մ. Գեղամյանը, վրաերթի ենթարկվածը Արմավիրի մարզի բնակիչ 15-ամյա Մհեր Ա․-ն է, ով Cadillac-ի վարորդի կողմից ծայրահեղ ծանր ախտորոշմամբ տեղափոխվել է «Աստղիկ» բժշկական կենտրոն, որտեղ բժիշկները նախ տեղում առաջին անհրաժեշտ բուժօգնությունն են ցուցաբերել, ապա տեղափոխել են «Սուրբ Աստվածամայր» բժշկական կենտրոն։
Պարզվել է նաև, որ Ա․ Մելիքսեթյանը, նրա ուղևոր 37-ամյա Ա. Մաթևոսյանը տեղափոխվել են «Վաղարշապատ» բժշկական կենտրոն, որտեղ անհրաժեշտ բուժօգնություն ստանալուց հետո տեղափոխվել են Երևանի «Շենգավիթ» բժշկական կենտրոն։
Ավտովթար–վրաերթը տեղի է ունեցել նախօրեին ժամը 16։18-ի սահմաներում։ Մայրաքաղաքային փողոցում դեպի Երևան ընթանալիս Cadillac մակնիշի ավտոմեքենան բախվել է Opel մակնիշի ավտոմեքենային, վերջինիս վարորդը, չկարողանալով կառավարել ավտոմեքենան, վրաերթի է ենթարկել անչափահաս տղա հետիոտնին, այնուհետև բախվել է կայանված Mercedes-ին և Ford Transit-ին։
Վրաերթի ենթարկված երեխան շպրտվել է ու կպել շինության քարե հատվածին և ընկել ավտոմեքենայի վրա։ Վարորդը իր ավտոմեքենայով երեխային, որ գտնվելիս է եղել ծայրահեղ ծանր վիճակում, տեղափոխել է «Աստղիկ» բժշկական կենտրոն։ Այս պահին բժիշկները պայքարում են երեխայի կյանքի համար։
Ծանուցում. ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով։–0–