Խոշոր ՃՏՊ Երևանում. կանչի վայր մեկնող հրշեջ մեքենան բախվել է Opel–ին

ԵՐԵՎԱՆ, 18 հուլիսի. /Նովոստի–Արմենիա/. Այսօր՝ հուլիսի 18-ին, խոշոր ավտովթար է տեղի ունեցել Երևանում:

Ժամը 08:40-ի սահմաններում Անդրանիկի և Տիչինայի փողոցների խաչմերուկում բախվել են Isuzu մակնիշի և Opel Vectra մակնիշի ավտոմեքենաները, հաղորդում է shamshyan.com–ը։

Վթարի հետևանքով Opel-ի վարորդը տեղափոխվել է «Աստղիկ» բժշկական կենտրոն:

Վիրավորին առաջինը օգնության են հասել հարևանությամբ բնակվող սեփական տան բնակիչները: Բախման հետևանքով Opel-ը հայտնվել է հրշեջ ավտոմեքենայի և ճանապարհին տեղադրված երկաթե սյան արանքում:

Քննիչի կողմից փաստի առթիվ նյութեր են նախապատրաստվում:

Կայքի հաղորդմամբ` Isuzu մակնիշի ավտոմեքենան հաշվառված է ՀՀ Արտակարգ իրավիճակների նախարարության փրկարար ծառայության հաշվեկշռում։ Հրշեջ մեքենան հրդեհի կանչով մեկնում էր դեպքի վայր և, փրկարարների խոսքերով, իրենք միացրած են եղել լուսային ու ձայնային ազդանշանները:

Ոստիկանությունն ու քննչական բաժինը պարզում են վարորդների ինքնությունը:

Կայքի հաղորդմամբ` Opel-ի վարորդն աշխատում է ՀՀ արդարադատության նախարարության հարկադիր կատարողների ծառայության Մալաթիա-Սեբաստիայի բաժնում: –0–