ԵՐԵՎԱՆ, 1 մարտի. /Նովոստի–Արմենիա/. Նախօրեին՝ փետրվարի 28-ին, արտակարգ դեպք է տեղի ունեցել Լոռու մարզում։
Shamshyan.com–ի հաղորդմամբ, ՀՀ Արդարադատության նախարարության «Վանաձոր» քրեակատարողական հիմնարկի ծառայողները նկատել են, որ թիվ 31 խցում դատապարտյալ, 28-ամյա Նիկոլայ Ցուցունովը ինքնասպանություն գործելու նպատակով սանհանգույցի օդատար խողովակի մեջ մոտ 40 սմ երկարության շրիշակ է հարմարեցրել և սավանի պատռված կտորները շրիշակից կապելով՝ փորձում է կախվելու միջոցով ինքնասպան լինել։
Կայքի հաղորդմամբ, աշխատակիցներն օպերատիվ կերպով կանխել են Մ. Ցուցունովի ինքնասպանությունը, ով դատապարտվել է ազատազրկման 2 տարի 6 ամիս ժամկետով` մեղադրվելով ՀՀ ՔՕ 177 հոդվածի 2-րդ մասի 3-րդ կետի հատկանիշով (գողություն)։
Նա Վանաձորի բանտում է գտնվում անցյալ տարվա մարտի 25-ից։
Փաստի առթիվ ՀՀ Արդարադատության նախարար Արփինե Հովհաննիսյանի որոշմամբ նշանակվել է ծառայողական քննություն, իսկ «Վանաձոր» ՔԿՀ-ում էլ հետաքննություն է սկսվել։–0–
Ծանոթացեք լուրերին առաջինն ու քննարկեք դրանք մեր Telegram-յան ալիքում