ԵՐԵՎԱՆ, 2 օգոստոսի. /Նովոստի-Արմենիա/. Երեքշաբթի «Վանաձոր» քրեակատարողական հիմնարկի աշխատակիցները հայտնաբերել են իրենց գործընկերոջը` պարանոցի և ձեռքերի երակների կտրվածքներով:
Ժամը 10:00-ի սահմանում «Վանաձոր» ՔԿՀ–ի աշխատակիցները Վանաձորի բանտի հարևանությամբ գտնվող կիսակառույց եռահարկ շենքի նկուղում հայտնաբերել են Վանաձոր քաղաքի բնակիչ 54-ամյա Հարություն Հովհաննիսյանին:
Ինչպես հաղորդում է
shamshyan.com կայքը, Հովհաննիսյանը հիվանդանոց է տեղափոխվել պարանոցի և ձեռքերի երակների կտրվածքներով:
Կայքի տեղեկություններով, նա աշխատում է «Վանաձոր» ՔԿՀ-ում՝ որպես կրտսեր մասնագետ, ամուսնալուծված է և բնակվում է միայնակ:
«Փաստի առթիվ Հայաստանի քննչական կոմիտեի Լոռու մարզային քննչական վարչությունում հարուցվել է քրեական գործ, իսկ ոստիկաններն ու քննիչները նրա տանը հայտնաբերել են մի քանի երկտողեր, որտեղ նշված է, որ կատարվածի համար խնդրում է իրեն չմեղադրել, իսկ ինքը այդ ծայրահեղ քայլին է դիմել, քանի որ վարկերի մեջ է», - նշվում է հաղորդագրության մեջ:
Դեպքի վայրում ոստիկաններն ու քննիչները հայտնաբերել են արյունոտ դանակ, բջջային հեռախոս, որոնք ընթերակաների ներկայությամբ առգրավվել են, իսկ հայտնաբերված երկտողերի համար նշանակվել են մի շարք փորձաքննություններ, այդ թվում՝ հետքաբանական, ձեռագրաբանական և մատնադրոշմային: -0-
