Արմավիրի մարզում 46–ամյա աները որսորդական հրացանով սպանել է 31–ամյա փեսային

ԵՐԵՎԱՆ, 1 մարտի./Նովոստի–Արմենիա/. Նախօրեին՝ փետրվարի 28-ին, սպանություն է տեղի ունեցել Արմավիրի մարզում:

Shamshyan.com–ի հաղորդմամբ, ժամը 16:50-ի սահմաններում ՀՀ Ներքին գործերի նախարարության Ոստիկանության Վաղարշապատի բաժին օպերատիվ տեղեկություններ են ստացվել, որ Ջրառատ գյուղի Թումանյան փողոցում կրակոցներ են հնչել և կա վիրավոր:

Ժամանելով նշված գյուղ՝ ոստիկանները հայտնաբերել են Opel մակնիշի ավտոմեքենա, որի աջ կողմում՝ գետնին, հայտնաբերվել է հրազենային վնասվածքներով տղամարդու դի:

Ոստիկանները ու քննիչները պարզում են, որ սպանվածը նույն գյուղի բնակիչ 31-ամյա Կարեն Մ.-ն է։

Կայքի հաղորդմամբ, ոստիկանները գյուղացիների հետ զրույցում պարզել են ենթադրյալ սպանություն կատարողի ինքնությունը, ով Կոտայքի մարզի բնակիչ 46-ամյա Արմեն Խ.–ն է: Գյուղացիները նաև նշել են, որ սպանվածը գյուղում ամենահարգված երիտասարդներից էր, իր ընտանիքին նվիրված։ Աները, ով Զովունիում է ապրում, տաքսիով եկել է գյուղ ու որսորդական հրացանով կրակել փեսայի ուղղությամբ:

Դեպքի վայրում հայտնաբերվել են արնանման հետքեր, արնանման պարագաներ` որպես տաքսի շահագործվող Opel-ի մեջ, արյունոտված բահ, իսկ ղամիշների մոտ հայտնաբերվել են հանցագործության գործիք հրազենը և բջջային հեռախոսը, որի վրա կան արնանման հետքեր:

Դեպքի փաստով նախաձեռնվել է քրեական վարույթ: Քննիչի որոշմամբ Ա. Խանոյանը ձերբակալվել է:

Ծանուցում. ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով՝ դատարանի՝ օրինական ուժի մեջ մտած դատավճռով։ –0–