Սարսափելի դեպք Գյումրիում. 38–ամյա տղամարդը ծեծել է 62–ամյա հորեղբորը, վերջինս մահացել է

ԵՐԵՎԱՆ, 7 մարտի./Նովոստի–Արմենիա/. Մարտի 5-ին, ժամը 03.15-ին, ոստիկանություն հաղորդում էր ստացվել, որ Գյումրի քաղաքի Մելիք Սարգսյան փողոցի տներից մեկում դիակ կա, հաղորդում է ՀՀ ոստիկանությունը:

Ժամը 03.30-ին Մոսկվայից ոստիկանության Կումայրիի բաժին էր զանգել մի քաղաքացի և խնդրել, որ Մելիք Սարգսյան փողոցի նշված տուն շտապ ոստիկաններ մոտենան:

Մեկնած օպերատիվ-քննչական խումբը վերոհիշյալ տանը հայտնաբերել է 62-ամյա Վռամ Հ.-ի դին:


Արտաքին զննությամբ դիակի վրա մարմնական վնասվածքներ են հայտնաբերվել: Նշանակվել է դատաբժշկական փորձաքննություն: ՀՀ քրեական օրենսգրքի 112-րդ հոդվածի 2-րդ մասի 14-րդ կետի մեղադրանքով հարուցվել է քրեական գործ (Դիտավորությամբ առողջությանը ծանր վնաս պատճառելը):

«Ոստիկանության Շիրակի մարզային վարչության, Մուշի և Կումայրիի բաժինների ծառայողների համատեղ ձեռնարկած օպերատիվ-հետախուզական միջոցառումների և քննչական գործողությունների արդյունքում, մարմնական վնասվածք պատճառելու կասկածանքով, ոստիկանության Կումայրիի բաժին բերման է ենթարկվել 38-ամյա Սմբատ Հ.-ն: Նա խոստովանական ցուցմունք է տվել, որ մարտի 4-ին, ժամը 22.00-ի սահմաններում, ոգելից խմիչքի ազդեցության տակ ծեծի է ենթարկել 62-ամյա հորեղբորը, որը մահացել է», – նշվում է գերատեսչության հաղորդագրության մեջ:

Սմբատ Հ.-ն ձերբակալվել է: Կատարվում է նախաքննություն:

ՀՀ ոստիկանության հաղորդմամբ, ոստիկանության Կումայրիի բաժնի ՔՀԲ ծառայողների ձեռնարկած օպերատիվ-հետախուզական միջոցառումների արդյունքում պարզվել է, որ 38-ամյա Սմբատ Հ.-ն 2016 թ. հոկտեմբերի 5-ից ՌԴ Ստավրոպոլ քաղաքի ՆԳՎ կողմից հետախուզվում էր ՌԴ քրեական օրենսգրքի 131-րդ հոդվածի 2-րդ մասի մեղադրանքով: Խափանման միջոցը՝ ստորագրություն:

Հայտնաբերման մասին տեղյակ է պահվել հետախուզումը նախաձեռնողին և դատախազությանը:–0–