Հայտնի երգչուհի Մարիամ Մերաբովան հնչյունավորել է Disney կինոստուդիայի նոր մուլտֆիլմի հերոսուհիներից մեկին

ԵՐԵՎԱՆ, 24 նոյեմբերի. /Նովոստի–Արմենիա/. Հայտնի ջազ երգչուհի Մարիամ Մերաբովան հնչյունավորել է Disney կինոստուդիայի «Մոանա» նոր անիմացիոն ֆիլմի հերոսուհիներից մեկին։

«Սիրելի ընկերներ, ուրախ եմ տեղեկացնել, որ ես իրականացրել եմ իմ երազանքն ու կյանքում առաջին անգամ հնչյունավորել մեծ դեր մուլտֆիլմում, այն էլ ինչ մուլտֆիլմում», – Facebook–յան իր էջում գրել է Մերաբովան։

Երգչուհին հնչյունավորել է Տալա տատիկին։ Մուլտֆիլմի բնօրինակում նրան հնչյունավորել է դերասանուհի Ռեյչել Հաուսը։

«Հնչյունավորել եմ Տալա տատիկին, որը շատ իմաստուն է, հաճելի, հոգատար և չարաճճի։ Ամենահաճելին այն է, որ բնօրինակում Տալա տատիկին հնչյունավորած Ռեյչել Հաուսի հետ մենք իսկապես ինչ–որ տեղ նման ենք, և հնչերանգով ստուդիան ընտրել է հենց ինձ։ Մենք Տալայի հետ և խոսելու ենք, և երգելու», – գրել է Մերաբովան։


«Մոանա» նոր անիմացիոն ֆիլմը Ռուսաստանում մեծ էկրան կբարձրանա դեկտեմբերի 1–ին, իսկ մուլտֆիլմի համաշխարհային պրեմիերան տեղի է ունեցել նոյեմբերի 14–ին։

Խիզախ Մոան, ով խաղաղօվկիանոսյան կղզում բնակվող փոքր ցեղախմբի առաջնորդի դուստրն է, ամենից շատ երազում է ճամփորդությունների մասին և որոշում է մեկնել վտանգավոր ծովային ճամփորդության։–0–