Ֆրանսիացի հայտնի դերասան Պատրիկ Շենեն տպավորված է Հայաստանում կատարած աշխատանքից
ԵՐԵՎԱՆ, 14 հուլիսի. /Նովոստի-Արմենիա/. Ֆրանսիացի հայտնի դերասան Պատրիկ Շենեն, ով Երևանում է գտնվում «Ոսկե ծիրան» 12-րդ միջազգային կինոփառատոնին մասնակցելու նպատակով, երկուշաբթի լրագրողներին պատմեց նոր ֆիլմի մասին, որի նկարահանումներն անցկացվել են Հայաստանում:
«Ինչպես մի ամերիկյան երգ» աշխատանքային անվանումը կրող ֆիլմի ռեժիսորը ֆրանսահայ հայտնի ռիսոր Սերժ Ավեդիքյանն է:
«Չափազանց տպավորված եմ այդ աշխատանքով: Նկարահանվել եմ ավելի քան 75 ֆիլմերում, բայց այս հայկական փորձը հիասքանչ էր: Ծնվել եմ և ամբողջ կյանքս ապրել եմ Փարիզում, բայց հանկարծ հայտնվեցի աշխարհի մյուս ծայրում, որտեղ ապրում են բաց և ուրախ, զվարճալի մարդիկ: Դա անգնահատելի փորձ էր»,- ասաց Շենեն:
Ժապավենի ռեժիսոր Սերժ Ավեդիքյանն իր հերթին պատմեց, որ ֆիլմի նկարահանումներն անցկացվել են Վայոց Ձորի Խաչիկ սահմանամերձ գյուղում: «Մենք ավարտել ենք նկարահանումները բառացիորեն նախորդ շաբաթ: Մեր ֆիլմը պատմում է հայի էության մասին տարեց ֆրանսիացու աչքերով»,- պատմեց Ավեդիքյանը:
Ըստ նրա, ֆիլմում նկարահանվել է նաև կանադահայ հայտնի դերասանուհի Արսինե Խանջյանը:
Շենեն «Ոսկե ծիրան» փառատոնի «Ֆրանսիական նոր կինո» ծրագրի հատուկ հյուրն է: Դերասանը կներկայացնի Ստեֆան Բրիզեի «Ես նրա համար չեմ այստեղ, որ ինձ սիրեն» ֆիլմը, որտեղ նա գլխավոր դեր է կատարել:
Պատրիկ Շենեն ծնվել է 1947 թվականին: Դրամատիկ դերասանի կարիերան սկսել է թատրոնում 1968 թվականին Փարիզի դրամատիկ արվեստի կոնսերվատորիան ավարտելուց հետո:
Առաջին անգամ հայտնվել է էկրանին 1970 թվականին, բայց առաջին նշանակալի դերը «Կրիայի կղզուց փրկվածները» ֆիլմում էր:
Երկար տարիներ Շենեն համարվում էր երկրորդ պլանի դերասան: Եվ «Սեզար» կինոմատոգրաֆիական հեղիակավոր մրցանակի նա արժանացել է որպես երկրորդ պլանի դերասան («Ընթերցողը», 1989 թվական):
Պատրիկ Շենեի ֆիլմագրությունում 100 ֆիլմ կա: Դերասանն իր լուրջ հաջողությունն է համարում «Ես այստեղ նրա համար չեմ, որ ինձ սիրեն» ֆիլմը, որի գլխավոր դերի համար նա 2006 թվականին եղել է «Սեզարի» և տղամարդու լավագույն դերի համար Եվրոպական կինոակադեմիայի մրցանակի նոմինանտ:
Շենեն ունի նաև ռեժիսորական գործ` «Քաղցր տղա»: 2013 թվականին ռեժիսոր Մարիոն Վերնուն Շենեին հրավիրեց «Լավագույն օրերն առջևում են» իր նոր ֆիլմում խաղալու համար, որտեղ նրա խաղընկերուհին Ֆանի Արդանն էր:
«Ոսկե ծիրան» XII միջազգային կինոփառատոնն անցկացվում է Երևանում հուլիսի 12–19–ը։ Փառատոնն անցկացվում է Երևանում 2004 թ.–ից, այն տարածաշրջանի ամենահեղինակավոր փառատոներից է։ Տարբեր տարիների փառատոնի շրջանակում Երևան են այցելել աշխարհահռչակ դերասաններ և ռեժիսորներ, որոնց շարքում՝ գրող և սցենարիստ Տոնինո Գուերան, անվանի դերասանուհիներ Կլաուդիա Կարդինալեն և Ֆանի Արդանը: 2010-ին Երևանյան կինոփառատոնն արժանացել է կինոյի, հեռուստատեսության և սպորտի Ficts Plate D'honneur միջազգային միության գլխավոր մրցանակի: «Նովոստի-Արմենիան» կինոփառատոնի տեղեկատվական հովանավորն է:-0-
