Հայաստանի մարզային թատրոնները դոտացիաների պակասի խնդիր ունեն. Ղազանչյան

ԵՐԵՎԱՆ, 26 մարտի. /Նովոստի–Արմենիա/. Հայաստանի մարզային թատրոնները բախվում են դոտացիաների պակասի խնդրի հետ, հինգշաբթի «Արտավազդ» թատերական ամենամյա մրցանակաբաշխությանը նվիրված մամուլի ասուլիսում ասաց Հայաստանի թատերային գործիչների միության նախագահ Հակոբ Ղազանչյանը։

Հայաստանի մշակույթի նախարարության օժանդակությամբ Հայաստանի թատերական գործիչների միությունը մարտի 27–ին` Թատրոնի միջազգային օրը, կազմակերպում է «Արտավազդ» ազգային թատերական ամենամյա մրցանակաբաշխություն, որն այս տարի նվիրված է ԽՍՀՄ ժողովրդական արտիստ Սոս Սարգսյանի 85–ամյակին։

Ղազանչյանի խոսքով, մարզային թատրոնների նորմալ ստեղծագործական գործունեությանը խանգարում են մի շարք սոցիալական և կենցաղային խնդիրներ։

««Արտավազդ» մրցանակաբաշխության շրջանակում այս տարի մենք որոշել ենք անցկացնել մեր երկրի մարզային թատրոնների փառատոն–տեսություն, որ հնարավորություն տանք ինչ–որ կերպ մասնակցել այս մրցույթին»,– նշեց Ղազանչյանը։

Ըստ նրա, համալսարանն ավարտելուց հետո ինքը գրեթե հինգ տարի աշխատել է Կապանի թատրոնում, և հեռանալուց հետո էլ չի կորցրել կապը նրանց հետ` շարունակելով ներկա լինել բեմադրություններին նաև Թատերական գործիչների միության նախագահ դառնալուց հետո։

«Ամեն իմ այցելության ժամանակ ես նոր խնդիրներ եմ տեսել, որոնք այսօր խոչընդոտում են Հայաստանում մարզային թատրոնների զարգացմանը»,– ասաց նա։

Ղազանչյանը նշեց, որ մարզային թատրոնների խնդիրների լուծման հարցում մեծ դեր պետք է խաղան տեղական իշխանությունները։

«Այսօր տպավորություն ունեմ, որ ոչ բոլոր մարզերում է ղեկավարությունը հետաքրքրվում թատրոնների վիճակով, քանի որ որևէ լուրջ քայլեր նրանց վիճակի լավացման համար չկան»,– նշեց Ղազանչյանը։

Ըստ նրա, մարզերում թատրոնների զարգացումը ոչ թե ստեղծագործական, այլ քաղաքական խնդիր է, քանի որ թատրոնն արվեստի այն տեսակն է, որը միավորում է ստեղծագործական այլ ոլորտները։

Հայաստանի ժողովրդական արտիստ Վահե Շահվերդյանն իր հերթին կոչ արեց Մշակույթի նախարարությանն ավելի մեծ ուշադրություն դարձնել մարզային թատրոններին։ «Դա, նախևառաջ, վերաբերվում է ֆինանսական օգնությանը, և դրա համար անհրաժեշտ է, որ Նախարարությունը պետպատվերների բաշխման –ժամանակ նախընտրություն տա մարզային, ոչ թե երևանյան թատրոններին»,– նշեց Շահվերդյանը։

Արտավազդը Հայաստանի ազգային ամենամյա թատերական մրցանակ է, որը շնորհվում է թատերական տարվա արդյունքներով։ Ավանդաբար, այն անցկացվում է Թատրոնի միջազգային օրը` մարտի 27–ին։ Մրցանակը հիմնվել է 2002 թվականին։ -0-