«Մանկական Եվրատեսիլ 2014»-ը հայ հանդիսատեսի համար կմեկնաբանի Առաջին ալիքի հաղորդավար Ավետ Բարսեղյանը
ԵՐԵՎԱՆ, 14 նոյեմբերի. /Նովոստի-Արմենիա/. «Մանկական Եվրատեսիլ 2014»-ը հայ հանդիսատեսի համար կմեկնաբանի Առաջին ալիքի հաղորդավար Ավետ Բարսեղյանը, հաղորդում է Հայաստանի հանրային հեռուստաընկերության մամուլի ծառայությունը:
«Մանկական Եվրատեսիլ 2014» մրցույթը տեղի կունենա վաղը Մալթայում: Հայաստանը մրցույթում ներկայացնում է 11-ամյա Բեթթին (Էլիզաբեթ Դանիելյան), ով ելույթ կունենա «People of the sun» երգով՝ 12-րդ համարի ներքո:
Քվեարկության հայաստանյան արդյունքները կհայտարարի «Մանկական Եվրատեսիլ 2013»-ի հայ մասնակից Մոնիկա Ավանեսյանը:
Մրցույթը կարելի է դիտել Հանրային հեռուստաընկերության եթերում վաղը՝ նոյեմբերի 15-ին, ժամը 21:40-ին կամ լսել Հանրային ռադիոյով՝ Երևանում 107.7 հաճախականությամբ:
Մրցույթն այս տարի կանցկացվի #together-միասին կարգախոսի ներքո: «Մանկական Եվրատեսիլի» պատմության ընթացքում առաջին անգամ մրցույթը կանցկացվի կղզում: Մրցույթի տարբերանշանը խորհրդանշում է Մալթայի 8 կետանի խաչը, որի տարբեր մասնիկները գույներ ստացած միանում են իրար` ստեղծելով մեկ գաղափար` միասնություն: Գույները խորհրդանշում են Մալթայի բնությունը` ծովը, ավազը, քարերը, խոտը, երկինքն, մթնշաղն ու արևամուտը:
Մրցույթի մասնակից պետությունները 16-ն են՝ Հայաստան, Վրաստան, Բելառուս, Բուլղարիա, Կիպրոս, Իտալիա, Մալթա, Մոնտենեգրո, Ռուսաստան, Սերբիա, Շվեդիա, Սլովենիա, Նիդերլանդներ, Խորվաթիա, Սան Մարինո և Ուկրաինա:
Հայաստանը «Մանկական Եվրատեսիլին» մասնակցում է 2007թ.–ից։ Առաջին անգամ մրցույթին Հայաստանը ներկայացրել է «Արևիկ» մանկական խումբը` «Երազանք» երգով` զբաղեցնելով երկրորդ տեղը։ 2008թ.–ին Մոնիկա Մանուչարյանը ներկայացել է «Իմ երգի հնչյունները» երգով և զբաղեցրել ութերորդ տեղը: 2009թ.–ին Լուարա Հայրապետյանն իր «Բարսելոնա» երգով նվաճեց երկրորդ տեղը`այդ տեղը կիսելով Ռուսաստանի ներկայացուցիչ Եկատերինա Ռյաբովայի հետ։ Մեկ տարի անց «Մանկական Եվրատեսիլ» մրցույթին Մինսկում հաղթող ճանաչվեց Հայաստանը ներկայացնող ԼՂՀ-ից 12–ամյա Վլադիմիր Արզումանյանը, իսկ 2011թ.–ին մրցույթն անցկացվեց Երևանում, որտեղ Հայաստանը ներկայացրեց երգչուհի Դալիթան։
Compass Band հայկական խումբը, որը 2012թ.–ին Ամստերդամում ներկայացրեց Հայաստանը, զբաղեցրեց երրորդ տեղը։ 2013 թ.-ին Հայաստանը ներկայացնող Մոնիկա Ավանեսյանը Կիևում կայացած մրցույթին զբաղեցրեց վեցերորդ տեղը: -0-
