Հայկական ժողովրդական համույթը ելույթ է ունեցել Պորտուգալիայում առաջին անգամ անցկացված Հայկական մշակույթի շաբաթվա շրջանակում
ԵՐԵՎԱՆ, 29 հոկտեմբերի. /Նովոստի-Արմենիա/. «Շողակն» հայկական ժողովրդական համույթը ելույթ է ունեցել Պորտուգալիայում առաջին անգամ կազմակերպված Հայկական մշակույթի շաբաթվա շրջանակում, տեղեկացրեց համույթի մենակատար, Հայաստանի վաստակավոր արտիստ Հասմիկ Հարությունյանը:
Լիսաբոնում հոկտեմբերի 12-19-ը կայացած Հայկական մշակույթի շաբաթվա շրջանակում կազմակերպվել են բազմաթիվ համաժողովներ, սիմպոզիումներ, ցուցահանդեսներ, սիմֆոնիկ և կամերային համույթների, երգչախմբերի ելույթներ: Միջոցառման կազմակերպիչը «Գալուստ Գյուլբենկյան» հիմնադրամի հայկական համայնքների ստորաբաժանումն է:
«Ավելի վաղ Պորտուգալիայում կազմակերպվել էին առանձին համերգներ, սակայն հայկական մշակույթն առաջին անգամ է լիարժեքորեն ներկայացվել հայ և պորտուգալացի հանդիսատեսին», - ասաց Հարությունյանը չորեքշաբթի մամուլի ասուլիսի ժամանակ:
Նրա խոսքով՝ Հայկական մշակույթի շաբաթը մեկնարկել է հենց «Շողակն» համույթի ելույթով, որը հանդիսատեսին է ներկայացրել «Ճանապարհ դեպի Հայաստան» խորագրով համերգը:
«Համույթի արտիստները ելույթը նվիրել են իրենց ուսուցիչ, հռչակավոր հայ երաժիշտ Հայրիկ Մուրադյանի հիշատակին», - նշեց Հարությունյանը:
Համերգին «Շողակն» համույթի կատարմամբ հնչել են հայկական ավանդական երգեր և գործիքային ստեղծագործություններ:
«Շողակն» համույթը ստեղծվել է 1995թ.-ին: Համույթի առաքելությունն է ներկայացնել հայկական երգն ու պարը աշխարհի տարբեր երկրներում: Երաժշտական համույթը հավատարիմ է մնում Կոմիտասի ավանդույթներին ժողովրդական մշակույթում, դրանց պահպանմանը և փոխանցմանը նոր սերունդներին:-0-
