Թեոդոր Աքսենտովիչի աշխատանքների ցուցահանդեսն է բացվելու Հայաստանի ազգային պատկերասրահում հոկտեմբերի 8–ին

ԵՐԵՎԱՆ, 6 հոկտեմբերի. /Նովոստի–Արմենիա/. Լեհահայ հատնի գեղանկարիչ Թեոդոր Աքսենտովիչի աշխատանքների ցուցահանդեսը կբացվի Հայաստանի ազգային պատկերասրահում հոկտեմբերի 8–ին, հայտարարեց Ազգային պատկերասրահի տնօրեն Փարավոն Միրզոյանը։

«Այս տարվա հունիսին լեհական Սոպոտում բացվեց մեր մեծանուն հայրենակից Հովհաննես Այվազովսկու ցուցահանդեսը, որին ներկա է գտնվել նաև Լեհաստանի նախագահը։ Մեզ համար մեծ պատիվ ու ուրախություն է, որ կարող ենք հայ հասարակությանը ներկայացնել մեկ այլ մեծ հայի` Թեոդոր Աքսենտովիչի աշխատանքները»,– երկուշաբթի մամուլի ասուլիսում հայտնեց Միրզոյանը։

Սոպոտի պետական պատկերասրահի տնօրեն Զբիգնև Բուսկիի խոսքերով` Ցուցահանդեսի անցկացման նախաձեռնությունը Հայաստանի և Լեհաստանի նախագահներինն էր։

«Ինձ համար մեծ պատիվ է չորրորդ անգամ լինել ձեր հիանալի երկրում։ Երևանում ցուցահանդեսն անցկացնելու որոշումն ընդունվել է, երբ Լեհաստանում միաժամանակ անցել են Այվազովսկու և Աքսենտովիչի ցուցադրությունները։ Մենք մտածեցինք, որ ավելի լավ կլիներ հայկական լսարանին ծանոթացնել Աքսենտովիչի նկարների հետ»,– ասաց Բուսկին։

Հայաստանի մշակույթի փոխնախարար Արև Սամուելյանը նշեց, որ նմանատիպ ցուցահանդեսի անցկացումը կարևոր իրադարձություն է հայկական մշակութային կյանքում։

Ցուցադրությունում կներկայացվեն Աքսենտովիչի 55 նկարներ։ Ցուցահանդեսը կտևի մինչև դեկտեմբերի 15–ը։

Թեոդոր Աքսենտովիչը (Teodor Axentowicz, 1859—1938) լեհ ամենահայտնի դիմանկարիչներից է։ Իր աշխատանքներում նա հատուկ ուշադրություն է դարձրել գուցուլների և լեհահայերի ազգագրական կյանքի տեսարաններին («Հայաստանի մկրտությունը», «Հայերը Լեհաստանում»)։Թեոդոր Աքսենտովիչը Լվովի հայկական մայր տաճարի ապակենկարների հեղինակն է։ -0-