ԵՐԵՎԱՆ, 11 սեպտեմբերի. /Նովոստի–Արմենիա/. Հայաստանի պետական ֆիլհարմոնիկ նվագախումբը հոկտեմբերին հյուրախաղեր կունենա Ավստրիայում և Գերմանիայում, հինգշաբթի լրագրողներին հայտնեց նվագախմբի գեղարվեստական ղեկավար և գլխավոր դիրիժոր Էդուարդ Թոփչյանը։
«Նվագախումբը երեք համերգ կունենա, որոնց ընթացքում կհնչի Խաչատրյանի, Շոստակովիչի և Չայկովսկու երաժշտությունը։ Կներկայացնենք նաև մեր սեղմասկավառակը` Մոցարտի ստեղծագործություններով»,– հինգշաբթի հրավիրված ասուլիսի ընթացքում ասաց Թոփչյանը։
Հայաստանի պետական ֆիլհարմոնիկ նվագախումբը հոկտեմբերի 5-6–ը ելույթ կունենա ավստրիական Լինց և Կլագենֆուրտ քաղաքներում, իսկ հոկտեմբերի 10–ին` գերմանական Լյուբեկե քաղաքում։
Խոսելով նվագախմբի հյուրախաղերի երկացանկի մասին` Թոփչյանը նշեց, որ երկացանկում միշտ ընդգրկվում են Խաչատրյանի ստեղծագործությունները։
«Թեև Խաչատրյանն աշխարհահռչակ է, նրա Ջութակի համար կոնցերտը հաճախ անակնկալ է դառնում արտասահմանյան ունկնդրի համար»,– ասաց Թոփչյանը։
Հայաստանի պետական ֆիլհարմոնիկ նվագախումբը, որը 86 տարի առաջ հիմնել են հայ երաժիշտներ Արշակ Ադամյանը և Ալեքսանդր Սպենդիարյանը, տարիներ շարունակ եղել է նախկին ԽՍՀՄ–ի երաժշտական առաջատար կոլեկտիվներից մեկը։ Այսօր այն համարվում է պրոֆեսիոնալ նվագախմբային արվեստի ազգային կենտրոն։
Տարբեր ժամանակներում Հայաստանի պետական ֆիլհարմոնիկ նվագախումբը գլխավորել են Արշակ Ադամյանը, Ալեքսանդր Սպենդիարյանը, Սուրեն Չարեքյանը, Կոնստանտին Սարաջևը, Օհան Դուրյանը, Վալերի Գերգիևը, Լորիս Ճգնավորյանը։ 2000 թվականից նվագախմբի գեղարվեստական ղեկավարն ու գլխավոր դիրիժորն Էդուարդ Թոփչյանն է։
«Նովոստի–Արմենիա» գործակալությունը նվագախմբի տեղեկատվական հովանավորն է։ -0-
