Հայկական կոմպոզիտորական դպրոցը բարձր է գնահատվում ողջ աշխարհում. Սաթյան

ԵՐԵՎԱՆ, 27 հունիսի. /Նովոստի-Արմենիա/. Միջազգային մակարդակի փորձագետները բարձր են գնահատում հայկական կոմպոզիտորական դպրոցը, վստահեցնում է Հայաստանի կոմպոզիտորների միության նախագահ Արամ Սաթյանը:

«Մեր երիտասարդ կոմպոզիտորները բավականին բարձր գնահատականների են արժանանում, և ափսոս է, որ մենք չենք գնահատում մեր ձեռքբերումները: Քչերը գիտեն հայ ժամանակակից կոմպոզիտորների անունները Հայաստանի ներսում, այն դեպքում, երբ այդ երիտասարդ տաղանդներն առաջին տեղն են զբաղեցնում տարբեր միջազգային մրցույթներում», - ուրբաթ մամուլի ասուլիսի ժամանակ ասաց Սաթյանը:

Նրա խոսքով՝ հայկական հասարակությունը չափազանց քիչ ուշադրության է արժանացնում երիտասարդ տաղանդավոր կոմպոզիտորներին, այն դեպքում, երբ ցանկացած օտարերկրյա երաժիշտի հայ հանդիսատեսը մեծ ոգևորությամբ է դիմավորում:

«Եթե անգամ Հայաստան է գալիս միջակ օտարերկրյա երաժիշտ, մեզ մոտ նրան դիմավորում են մեծ ոգևորությամբ և հուզմունքով», - կարծում է կոմպոզիտորը:

Սաթյանը նշեց, որ այս միտումը պայմանավորված է այն հանգամանքով, որ երկրում ազգային արժեքները չեն քարոզվում, մասնավորապես՝ հեռուստատեսության միջոցով:

«Բոլոր ժամանակներում հայկական երաժշտությունը պահանջարկ է ունեցել, և ի՞նչ պատահեց հիմա, ինչու՞ այդ պահանջարկը հանկարծ անհետացավ: Պատճառն այն է, որ մեր հեռուստառադիոեթերը լցված է անորակ և անհասկանալի երաժշտությամբ, որը համարվում է հայկական», - պարզաբանեց Սաթյանը:

Նա ավելացրեց, որ հասարակությունը լավ հայկական երաժշտության կարիք ունի, սակայն չի ստանում այն:

«Մեր միության երաժիշտները վերջերս ելույթ են ունեցել Հայաստանի մարզերում, և մեզ բառացիորեն ողողել էին նամակներով՝ խնդրելով կրկնել համերգը: Ողջ խնդիրն այն է, որ մեզ քարոզչություն է հարկավոր», - ասաց կոմպոզիտորը:

Սաթյանը նշեց, որ միության գործունեությունն ուղղված է երիտասարդ կոմպոզիտորների աջակցությանը` համերգների, փառատոների և միջոցառումների միջոցով:-0-