«Հայաստանի փոքրիկ երգիչներ» երգչախումբը Բազելի փառատոնի հատուկ հյուրը կլինի

ԵՐԵՎԱՆ, 20 մայիսի. /Նովոստի–Արմենիա/. «Հայաստանի փոքրիկ երգիչները» երգչախումբը կլինի Երիտասարդական երգչախմբերի եվրոպական փառատոնի հատուկ հյուրը, որը տեղի կունենա Բազելում մայիսի 27–ից հունիսի 1–ը։

Երիտասարդական երգչախմբային փառատոնն անցկացվում է Շվեյցարիայի Բազել քաղաքում 1992 թ.–ից։

«Սա մեզ համար մեծ պատիվ և պատասխանատվություն է։ Միջոցառումը շատ լայնածավալ է։ Մեր ներկայացրած ծրագիրը հսկայական է` սկսած հոգևոր երաժշտությունից և վերջացրած ջազային ստեղծագործություններով, որոնք կուղեկցվեն պարային համարներով Նարինե Թոփալյանի բեմադրությամբ», – երեքշաբթի «Նովոստի–Արմենիա» գործակալությանը ասել է Հարությունյանը։

Փառատոնից առաջ և հետո «Փոքրիկ երգիչներ» երգչախումբը ելույթ կունենա Եվրոպայի տարբեր քաղաքներում։ Հյուրախաղերը կսկսվեն մայիսի 27–ին և կավարտվեն հունիսի 3–ին։
«Հայաստանի փոքրիկ երգիչներ» երգչախումբը ստեղծվել է 1992թ.-ին՝ Երևանի քաղաքապետարանի մշակույթի վարչության և «Հայաստանի փոքրիկ երգիչները» միջազգային միության մասնակցությամբ։ Երգչախմբում երգում են Հայաստանի տարբեր մարզերից ընդգրկված 4-18 տարեկան  տաղանդավոր երեխաներ։

Երգչախումբը հաճախ մասնակցում է տարբեր միջազգային փառատոների, համաշխարհային սիմպոզիումների, ցուցահանդեսների, որոնք անցկացվում են Բազելում (Շվեյցարիա, 1995 թ.), Հոն Կոնգում և Պեկինում (Չինաստան, 1999 թ.), ԷՔՍՊՈ 2000–ում (Հանովեր, Գերմանիա), «Ոսկե նավակ» փառատոնին (Սոչի, Ռուսաստան, 2001), «Դիմիտրիա»–ում (Թեսալոնիկի, Հունաստան, 2002), Երգչախմբային երաժշտության վեցերորդ համաշխարհային սիմոզիումին (Մինեապոլիս, ԱՄՆ, 2002), «Երգի միասնություն» հայ–ամերիկյան ամենամյա փառատոնին (Հայաստան)։–0–