«Ազգային պատկերասրահ» 10–րդ միջազգային երաժշտական փառատոնը կմեկնարկի մայիսի 7–ին

ԵՐԵՎԱՆ, 28 ապրիլի. /Նովոստի–Արմենիա/.  «Ազգային պատկերասրահ» 10–րդ միջազգային երաժշտական փառատոն կմեկնարկի մայիսի 7–ին, հայտնում է փառատոնի մամուլի ծառայությունը։

Փառատոնի շրջանակում, որը կտևի մինչև հունիսի 3–ը, կկազմակերպվեն հայ–ավստրիական, հայ–շվեյցարական և հայ–հրեական երաժշտության երեկոներ, կկազմակերպվեն նաև հոգևոր երաժշտության և վոկալի համերգներ։

Փառատոնը կբացվի երգչուհի Վարդուհի Խաչատրյանի (Շվեյցարիա) ելույթով դիրիժոր Հարություն Արզումանյանի գլխավորած Հայաստանի պետական կամերային նվագախմբի ուղեկցությամբ։

Մայիսի 10–ին կկայանա «Հայ–ավստրիական երաժշտական խաչմերուկ» հայ–ավստրիական երաժշտության երեկո, որի ընթացքում ելույթ կունենա ջութակահարուհի Լաիդա Ալբերդին (Իսպանիա), ջութակահար Միխայլո Զախարովը  (Ուկրաինա, Ավստրիա), ալտահար Գայանե Միրզոյանը (Հայաստան, Ավստրիա), թավջութակահար Ալեքսանդր Կարախանյանը  (Հայաստան, Ավստրիա) և դաշնակահարուհի Կարինե Հովհաննիսյանը։

Հոգևոր երաժշտության համերգին մայիսի 16–ին ելույթ կունենա «Սաղմոսերգու» տղամարդկանց երգչախումբը գեղարվեստական ղեկավար Վահե Բեղոյանի գլխավորությամբ։

Մայիսի 21–ին կանցկացվի վոկալ երաժշտության երեկո, որը նվիրված է Երևանի Կոմիտասի անվան պետական կոնսերվատորիայի պրոֆեսոր, օպերային երգիչ, Հայաստանի արվեստի վաստակավոր գործիչ Ռաֆայել Հակոբյանցի հիշատակին։ Համերգին կմասնակցեն Լիպարիտ Ավետիսյան (տենոր), Նունե Բադալյան (սոպրանո), Քրիստինե Սահակյան (մեցցո-սոպրանո), Սարգիս Բաժբեուկ-Մելիքյան (բաս):

Հայ-հրեական երաժշտական երեկոյի ընթացքում ելույթ կունենա դաշնակահար Հայկ Մելիքյան։Համերգի հատուկ հյուրն է լինելու կոմպոզիտոր Վիլլի Վայները։
Փառատոնի հանդիսավոր փակումը հունիսի 3–ին կնշանավորի հայ–շվեյցարական երաժշտության համերգը երկու երկրների երաժիշտների կատարմամբ։
Բոլոր համերգները կանցնեն Հայաստանի ազգային պատկերասրահում։
«Ազգային պատկերասրահ» փառատոնը, որը հիմնվել է 2005 թվականին, 2008 թվականից ընդգրկված է Մշակույթի նախարարության պետական աջակցության ծրագրերի ցուցակում։ -0-