Շառլ Ազնավուրը «Հավերժ երիտասարդություն» գրական մրցանակ է ստացել իր նոր գրքի համար

Հայկական արմատներ ունեցող հայտնի 87-ամյա երգիչ Շառլ Ազնավուրը «Մի դռնից մյուսը» իր նոր գրքի համար «Հավերժ երիտասարդություն» գրական մրցանակ է ստացել, տեղեկացնում է «Le Monde» ֆրանսիական հանդեսի կայքը։

Պարգևատրումը տեղի է ունեցել օգոստոսի 28-ին «Գրքի անտառ» փառատոնի ընթացքում՝ Ֆրանսիայի Շանսո-պղե-Լոշ գեղատեսիլ քաղաքում։ Այդ մրցանակին է  արժանացել նաև 92-ամյա ակադեմիկոս, սցենարիստ Ռենե դը Օբալդիան։

Մեկ ամսվա ընթացքում Ազնավուրը ելույթ է ունենալու Փարիզի «Օլիմպիա»  թատրոնի բեմում, այնուհետև հյուրախաղերով կմեկնի համաշխարհային շրջագայության։
Ինչպես գրում է «Իզվեստիա» թերթը, Ազնավուրը պատրաստվում է նաև կյանքի կոչել մնացած մտահղացումները։ «Ես այնքան ձայնագրություններ ունեմ, որոնք պետք է անպատճառ օգտագործեմ, -ասել է երգիչը։ -Եթե ես դա չանեմ, իմ երեխաները կնետեն դրանք իմ մահից հետո՝ ցավալի կլինի։ Թեպետ դեռ ժամանակ կա։ Ես պատրաստվում եմ 120 տարի ապրել՝ այժմ ես «հավերժ երիտասարդություն» ունեմ»։ -0-