Ֆրանսիական երգի փառատոն՝ Երևանում
![Ֆրանսիական երգի փառատոն՝ Երևանում Ֆրանսիական երգի փառատոն՝ Երևանում](/upload/iblock/1a1/2lgryyyaa2i7jwjcrn7x7kwr4dnlutmc.jpg)
ԵՐԵՎԱՆ, 15 ապրիլի. /Նովոստի-Արմենիա/. Ֆրանսիական երգի փառատոն կկայանա Երևանի պետական համալսարանում (ԵՊՀ) Հայաստանում Ֆրանկոֆոնիայի օրերի շրջանակներում, հաղորդում է ԵՊՀ մամուլի ծառայությունը։
Միջոցառումն իրականացվում է ԵՊՀ մշակույթի կենտրոնի և ռոմանագերմանական բանասիրության ֆակուլտետի ֆրանսիական բանասիրության ամբիոնի համատեղ ջանքերով:
«Միջոցառմանը ներկա կլինեն ԵՊՀ ղեկավարությունը, ներկայացուցիչներ ֆրանկոֆոն դպրոցներից (համար 45 ֆրանսիական թեքումով երկլեզու դպրոց, համար 48 ֆրանսիական թեքումով երկլեզու դպրոց, համար 119 ֆրանսիական թեքումով դպրոց) և բուհերից (Երևանի Վ. Բրյուսովի անվան պետական լեզվաբանական համալսարանը, Խ. Աբովյանի անվան պետական մանկավարժական համալսարանը, Հայաստանում ֆրանսիական համալսարանը, Ռուս-հայկական (Սլավոնական) համալսարանը)»,- ասվում է հաղորդագրությունում։
Փառատոնին կմասնակցեն ներկայացուցիչներ և ուսանողներ Երևանի Կոմիտասի անվան պետական կոնսերվատորիայից և ԵՊՀ-ից, ԵՊՀ մշակույթի կենտրոնի երգչախումբը, անհատ երգիչները և պարային համույթը:
Կազմակերպիչները խոստանում են, որ միջոցառումը ներկաներին մտովի կտեղափոխի Փարիզ, կլսեն միայն և միայն ֆրանսիական երգ ու երաժշտություն:
Ֆրանկոֆոնիայի օրերը Հայաստանում անցկացվում են Հայաստանի ԱԳՆ համակարգմամբ և ՀՀ Տարածքային կառավարման, կրթության և գիտության, մշակույթի նախարարությունների, Երևանի քաղաքպետարանի, Ֆրանսիայի, Կանադայի, Լիբանանի, Լեհաստանի, Ռումինիայի և Շվեյցարիայի դեսպանությունների, մի շարք համալսարանների և հասարակական կազմակերպությունների մասնակցությամբ։ -0-