Ժնևի գրքի և մամուլի միջազգային ցուցահանդեսի պատասխանատուները կծանոթանան հայկական մշակույթին

ՀՀ մշակույթի նախարարության հրավերով Հայաստան են ժամանել Ժնևի Գրքի և մամուլի միջազգային ցուցահանդեսի պատասխանատուները և մի խումբ շվեյցարացի լրագրողներ, տեղեկանում ենք ՀՀ մշակույթի նախարարության պաշտոնական կայքից:

Ինչպես նշված է հաղորդագրության մեջ, այցելության նպատակն է ծանոթանալ հայկական հին և նորօրյա մշակույթին, շփվել այդ մշակույթը պահպանողների ու կրողների հետ, պատրաստել տեղեկատվական բնույթի և հանրահռչակող նյութեր` ապրիլի 29-ից մայիսի 3-ը Ժնևի գրքի միջազգային ցուցահանդեսում Հայաստանը պատվավոր հյուրի կարգավիճակով պատշաճ ներկայացնելու համար:

Այցի շրջանակներում ՀՀ մշակույթի նախարար Հասմիկ Պողոսյանը նախարարությունում հյուրընկալեց Ժնևի Գրքի և մամուլի միջազգային ցուցահանդեսի նախագահ Պատրիկ Ֆեռլային, Ժնևի ցուցադրումների պալատի և ցուցահանդեսների ծառայությունների տնօրեն Բեռնար Քիոտին, գրքի և մամուլի միջազգային ցուցահանդեսի գործադիր տնօրեն Ադելին Բոյին և l’Hebdo, Le temp, 24 heures պարբերականների ներկայացուցիչներին:

Նախարարը պատասխանելով հյուրերին հետաքրքրող բազմաբնույթ հարցերին, ներկայացրեց մշակույթի տարբեր ոլորտները, մասնավորապես կանգ առնելով հայ գրչության, ապա և գրատպության 500-ամյա պատմության շրջադարձային դրվագներին ու թարգմանչաց արվեստին, ժամանակակից կյանքի անխուսափելի մաս դարձող էլեկտրոնային գրքերին: Նախարար Հասմիկ Պողոսյանը անդրադարձավ նաև հայ գրատպության 500-ամյակին նվիրված հայաստանյան և արտերկրի մի շարք ծրագրերի, փաստելով, որ այդ շարքի յուրաքանչյուր նախաձեռնություն միանշանակ վերահաստատելու է հայ ժողովրդի հավատարմությունը գրավոր ավանդույթներին ու մշակույթին:

Նա նաև նշեց, հայ գրատպության 500-ամյակին նվիրված ցուցադրությունների շարքը իրապես սկսվում է Ժնևից, որը ուրախալի է ու նաև խիստ պատասխանատու, ինչին ի պատասխան Ժնևի Գրքի և մամուլի միջազգային ցուցահանդեսի նախագահ, պատվիրակության ղեկավար Պատրիկ Ֆեռլան նախարարին հավաստիացրեց, որ իրենց կողմից կարվի ամեն ինչ, որպեսզի Հայաստանը Ժնևի գրքի միջազգային ցուցահանդեսում ներկայացվի լավագույնս:

Հանդիպման ավարտին նախարարը հույս հայտնեց, որ ժնևյան պատվիրակության ներկայացուցիչները այս օրերին այցելելով հայ միջնադարյան գրչության և դպրության կենտրոններ` Տաթևի վանք, Գլաձոր, Թարգմանչաց եկեղեցի, Մ. Մաշտոցի անվան Հին ձեռագրերի ինստիտուտ «Մատենադարան», երևանյան գրախանութներ, արվեստի օջախներ, շփվելով արվեստագետների ու մտավորականների հետ` Ժնևի Գրքի և մամուլի միջազգային առաջիկա ցուցահանդեսին առավել համապարփակ և ճշմարիտ կներկայացնեն պատվավոր հյուր`Հայաստանը:--0-