Ջիվան Գասպարյանը կոչ է անում հեռուստաալիքներին չաղտոտել եթերը անորակ երաժշտությամբ

ԵՐԵՎԱՆ, 17 հունվարի. /Նովոստի-Արմենիա/. Աշխարհահռչակ հայազգի դուդուկահար Ջիվան Գասպարյանը կոչ է արել հայկական հեռուստատեսությանը չաղտոտել եթերը անորակ երաժշտությամբ:

«Մենք, իհարկե, շատ տաղանդավոր երիտասարդ երաժիշտներ ունենք, սակայն շատ են նաև անտաղանդները: Ես ինքս ամաչում եմ, երբ լսում եմ նրանց ելույթը հեռուստատեսությամբ: Ես պարզապես չգիտեմ՝ ինչ ասեմ հեռուստատեսության մասին: Սա ուղղակի խայտառակություն է: Կարելի՞ է օրը 24 ժամ հեռարձակել միևնույն երաժիշտի ելույթը», - երկուշաբթի մամուլի ասուլիսի ժամանակ ասաց Գասպարյանը:

Նրա խոսքով՝ անորակ երաժշտության նմանատիպ քարոզը կարելի է պարզապես «չինական կտտանք» անվանել, որի դեպքում գլխի վրա դանդաղ ջուր է կաթում, որը մարդուն խելագարության է հասցնում:
Գասպարյանը ընդգծեց, որ այսօր հայկական էստրադայում մեղեդու միևնույն եղանակի և ոճի ընդօրինակում է նկատվում:

Այս ամենի կապակցությամբ նա նշեց, որ եթերը պետք է հասանելի լինի միայն արժանի երաժիշտներին:
Ջիվան Գասպարյանը աշխարհի հայտնի երաժիշտներից մեկն է, ողջ աշխարհում վաճառվում են նրա ձայնասկավառակների միլիոնավոր օրինակներ։ Հոլիվուդի առաջատար ռեժիսորները պարբերաբար հրավիրում են Գասպարյանին լավագույն ֆիլմերի երաժշտության ձայնագրման համար։ Արևմտյան հանդիսատեսի շրջանում նա հայտնի դարձավ «Գլադիատոր» կինոնկարի երաժշտության ձայնագրումից հետո, որտեղ դուդուկը ներդաշնակորեն միաձուլվում է դասական սիմֆոնիկ նվագախմբի հնչողության հետ:
Իր ստեղծագործական կյանքի ընթացքում նա ելույթ է ունեցել Վիեննայի սիմֆոնիկ, Լոնդոնի սիմֆոնիկ, Բոստոնի սիմֆոնիկ, Լոս Անջելեսի սիմֆոնիկ նվագախմբերի, ինչպես նաև համաշխարհային ճանաչում ունեցող երաժիշտներ Վալերի Գերգիևի, Լայոնել Ռիչիի, Փիթեր Գաբրիելի, Սթինգի, Բրայան Մեյի (Queen) հետ։ Մայքլ Բրուքի հետ Գասպարյանը ձայնագրել է «Black Rock» ալբոմը։-0-