Հոլիվուդի մամուլը 2010թ.-ի լավագույն դերասանուհիներ է ճանաչել Նատալի Պորտմանին և Աննետ Բենինգին

Հոլիվուդի օտարերկրյա  մամուլի ասոցիացիայի վարկանիշով՝ Նատալի Պորտմանն ու Աննա Բենինգը ճանաչվել են 2010թ.-ի լավագույն դերասանուհիներ, հաղորդում է ՌԻԱ Նովոստին:

«Ոսկե գլոբուս» մրցանակաբաշխության արարողությունը հեռարձակվում է NBC-ի ուղիղ եթերով:
Պորտմանն արժանացել է «Ոսկե գլոբուսի» Դարեն Արոնոֆսկիի «Սև կարապ» դրամայում հանդես գալու համար: «Լավագույն դրամատիկ դերասանուհի» անվանակարգում մրցում էին Նիքոլ Քիդմանը, Հոլի Բերին, Ջենիֆեր Լոուրենսն ու Միշել Ուիլյամսը:

Պորտմանը նշանված է ֆրանսիացի պարող և պարուսույց Բենջամին Միլպյեի հետ և նրանից երեխայի է սպասում: Նա մրցանակաբաշխության արարողությանը եկել էր անտիկ ոճի կաթնագույն զգեստով՝ առջևում նուրբ ծալքերով և դրապե կրծքակալի վրա վառ վարդագույն վարդով:

Հաղղորդավարի այն հարցին, թե ինչ է թաքնվում ծալքերի հետևում, 29-ամյա Պորտմանը պատասխանել է, որ դեռ կարող է կրել ցանկացած ձևի հագուստ, սակայն միշտ սիրել է ազատ հագուստը:

Զույգը ծանոթացել է նախորդ տարի Դարեն Արոնոֆսկիի «Սև կարապ» ֆիլմի նկարահանումների ժամանակ: Ֆիլմում Պորտմանը բալետի պարուհու դեր էր խաղում, իսկ Միլպյեն բեմադրում էր պարերը:

Բենինգը Լիզա Խոլոդենկոյի «Երեխաները կարգին են» ֆիլմում հանդես գալու համար արժանացել է լավագույն դերասանուհի կոչմանը մյուզիքլ և կատակերգություն ժանրում: Նրա մրցակիցներն էին Անջելինա Ջոլին, Էնն Հեթուեյը, Ջուլիանա Մուրն ու Էմմա Սթոունը:-0-