Հոկտեմբերի 21-ին Չայկովսկու անվան համերգասրահում հայտնի երգեհոնահարներ Լեո Կրեմերը և Էդուարդ Հովհաննիսյանը չորս ձեռքով կնվագեն Բախի՝ հատուկ երգեհոնի համար գրված լավագույն ստեղծագործությունները, ՌԻԱ Նովոստիին հաղորդեց Պետհամերգասրահի տնօրենի տեղեկալ Ալեքսանդր Կրաուտերը։
«Չափազանց հազվադեպ են երգեհոնահարները չորս ձեռքով նվագում՝ դա անսովոր է։ Բացի այդ, Կրեմերը և Հովհաննիսյանը շատ մտերիմ են, այդ իսկ պատճառով արվեստի տեսանկյունից լավ են հասկանում միմյանց»,- ասաց Կրաուտերը։
Ըստ նրա, «համերգի ծրագրում կհնչի Բախի՝ բացառապես երգեհոնի համար գրված երաժշտություն»։
«Բախն ու երգեհոնը մեկ ամբողջություն են։ Երգեհոնի համար Բախից լավ ոչ ոք չի գրել, այդ պատճառով էլ այն նվագելը միշտ էլ հետաքրքիր է»,- ասաց Պետհամերգասրահի տնօրենի տեղակալը։
Նրա խոսքերով, չնայած, որ «երգեհոնով Բախ շատ հաճախ են նվագում, բայց կատարման մակարդակը միշտ տարբերվում է»։
«Կրեմերը երգեհոնով Բախ կատարելու հիմնական մասնագետներից է, և Հովհաննիսյանն էլ՝ հրաշալի երգեհոնահար։ Նրանք միանման բարձր կատարողական մակարդակ ունեն, այդ պատճատռով համերգը շատ հետաքրքիր պետք է լինի»,- ավելացրեց նա։
Կրաուտերն ընդգծեց, որ առաջիկա համերգի տոմսերն արդեն վաճառված են։
«Տոմսերն այնքան էլ շատ չէին, և դրանք արագ վաճառվեցին։ Մենք ստիպված էինք տոմսարկղերին լրացուցիչ տոմսեր հանձնել, բայց դրանք ևս արդեն սպառվել են»,- ասաց գործակալության զրուցակիցը։
Հովհաննիսյանը, 1978թ.-ին ավարտելով Մոսկվայի պետական կոնսերվատորիան Միխայիլ Վոսկրեսենսկու (դաշնամուր) և Լեոնիդ Ռոյզմանի (երգեհոն) դասարաններում, հետագայում մեկնել է Արևմտյան Եվրոպա հայտնի երաժիշտների մոտ կատարելագործվելու, այդ թվում՝ Կրեմերի մոտ։ Ներկայում Հովհաննիսյանը ապրում է Ֆրանսիայում։
Կրեմերը 30 տարվա ընթացքում Շփայերի Տաճարի կապելմեյստերն ու երգեհոնահարն է, որտեղ ղեկավարում է նաև Ֆիլարմոնիայի երգչախումբը, «Սիմֆոնիետա Սաարբրյուկենա» կամերային նվագախումբը և Սաար երկրի Բախի համայնքի Երգչախմբային կապելլան։ Գերմանիայում ապրող պրոֆեսոր Կրեմերը, կատարողականությանը զուգընթաց, մեծ ուշադրություն է դարձնում մանկավարժական և լուսավորչական գործունեությանը։
Ներկայում երկու երգեհոնահարները ճանաչված վարպետներ են և մեծ մասսայականություն են վայելում աշխարհով մեկ։ -0-
