«Նռան հատիկ» մանկական թատերական փառատոնի եզրափակիչը տեղի կունենա Երևանում հոկտեմբերի 22-ից նոյեմբերի 2-ը

ԵՐԵՎԱՆ, 17 հոկտեմբերի./Նովոստի-Արմենիա/. «Նռան հատիկ» հանրապետական մանկական թատերական փառատոնի երրորդ փուլը տեղի կունենա Երևանում հոկտեմբերի 22-ից նոյեմբերի 2-ը։

Ինչպես չորեքշաբթի Երևանում լրագրողներին տեղեկացրեց փառատոնի կազմկոմիտեի նախագահ, Երևանի Ավետիք Իսահակյանի անվան կենտրոնական գրադարանի տնօրեն Հասմիկ Կարապետյանը, փառատոնի եզրափակիչին մասնակցելու են Հայաստանի տարբեր մարզերից ժամանած 19 մանկա-պատանեկան թատերական խմբեր։

Նրա խոսքով, առաջին փուլին, որը տեղի ունեցավ այս տարվա ամռանը, մասնակցեցին 28 թատերական կոլեկտիվներ։ «Փառատոնի երկրորդ փուլը կազմակերպվել էր ստեղծագործական ճամբարի տեսքով, որին մասնակցեցին տարբեր թատերական կոլեկտիվներ ներկայացնող 120 երեխաներ»,- ասաց նա։

Կարապետյանն ավելացրեց, որ փառատոնի խնդիրներից մեկը նոր մանկական թատերական խմբերի հայտնաբերումն է։ «Նռան հատիկը» անցկացվում է արդեն յոթերորդ անգամ. սա խոսում է միջոցառման անհրաժեշտության և կարևորության մասին»,- ընդծեց նա։

«Նռան հատիկ» հանրապետական մանկական թատերական փառատոնի կազմակերպիչն է «Նախաբեմ» մշակութային և կրթական միությունը՝ ՀՀ մշակույթի նախարարության աջակցությամբ։ --0—