Երկու լեգենդ երևանյան պոդիումում. կայացավ դիզայներ Վյաչեսլավ Զայցևի ցուցադրությունը` Ազնավուրի երգերի ուղեկցությամբ (ՏԵՍԱՆՅՈՒԹ, ԼՈւՍԱՆԿԱՐՆԵՐ)

ԵՐԵՎԱՆ, 15 մայիսի. /Նովոստի–Արմենիա/. Երևանում տեղի է ունեցել ռուս լեգենդար դիզայներ Վյաչեսլավ Զայցևի բացառիկ ցուցադրությունը` աշխարհահռչակ շանսոնյե Շառլ Ազնավուրի երգերի ուղեկցությամբ։

Ցուցադրությունը տեղի է ունեցել «Golden Lace» նորաձևության շաբաթվա շրջանակում, որն անցկացվել է Երևանում մայիսի 12–14–ը։

Աշխարհահռչակ դիզայները ներկայացրել է երեկոյան զգեստներ վերջին հավաքածուից, ինչպես նաև նախորդ հավաքածուների լավագույն նմուշները։


Ցուցադրությունը դարձավ նորաձևության իսկական տոն. շքեղ կտորները և նրբագեղ կերպարները, ժողովրդական մոտիվներն ու ոսկերչական զարդերի առատությունը գերեցին ցուցադրության այցելուների սրտերը։



Հայ հանդիսատեսն այնքան ջերմ ընդունեց նորաձևության վարպետին, որ նա չկարողացավ զսպել հույզերն ու արտասվեց։

«Անչափ շնորհակալ եմ։ Երջանիկ եմ, որ այսօր ձեզ հետ եմ...», – հուզված նշեց Զայցևը։


Ցուցադրությունից հետո դիզայները նշեց, որ շատ է սիրում ֆրանսահայ լեգենդար շանսոնյե Շառլ Ազնավուրի ստեղծագործությունները, որոնք գերում են իրեն մինչև սրտի խորքը։–0–