Մարկ Բուշկով. բելգիացի ջութակահարը Խաչատրյանի միջազգային 5-րդ փառատոնի բեմում

16.11.2017, 11:42
Հերթական համերգային երեկոյի ընթացքում՝ նոյեմբերի 16-ին նախատեսված է բելգիացի ջութակահար Մարկ Բուշկովի ելույթը:
Մարկ Բուշկով. բելգիացի ջութակահարը Խաչատրյանի միջազգային 5-րդ փառատոնի բեմում

ԵՐԵՎԱՆ, 16 նոյեմբերի. /Նովոստի–Արմենիա/. Հոկտեմբերից Հայաստանում ընթանում Է Խաչատրյանի 5-րդ միջազգային փառատոնը:

Փառատոնային ծրագիրն ընդգրկում է ինչպես հայաստանցի, այնպես էլ արտերկրից ժամանած մենակատարների, անսամբլների ելույթներ, հաղորդում է Հայաստանի պետական երիտասարդական նվագախմբի մամուլի ծառայությունը։

Հերթական համերգային երեկոյի ընթացքում՝ նոյեմբերի 16-ին նախատեսված է բելգիացի ջութակահար Մարկ Բուշկովի ելույթը: Ջութակահարը հայ հանդիսատեսին կներկայացնի Յան Սիբելիուսի ջութակի կոնցերտը: Համերգային մյուս մասում ելույթ կունենա Հայաստանի պետական երիտասարդական նվագախումբը՝ գեղարվեստական ղեկավար և դիրիժոր Սերգեյ Սմբատյան: Նվագախումբը կկատարի Պյոտր Չայկովսկու «Ռոմեո և Ջուլիետ» նախերգանք-ֆանտազիան:

Մարկ Բուշկովը ծնվել է 1991 թ.–ին երաժիշտների ընտանիքում: 5 տարեկանում իր առաջին դասերն է վերցրել պապիկից՝ Մաթիս Վայցներից: Ընդամենը մեկ տարի անց առաջին անգամ ելույթ է ունեցել հանդիսատեսի առջև: 2001-ին սկսել է սովորել Լիոնի ազգային կոնսերվատորիայում՝ Քլեր Բերնարդի ստուդիայում: 2007-ին տեղափոխվել է Փարիզի ազգային կոնսերվատորիա (CNSM): Այստեղ սկսել է ուսանել Բորիս Գարլիցկու հետ.վերջինս անգնահատելի խորհուրդներ է տալիս նրան կատարելագործելու սեփական վարպետությունը: Հաջորդիվ Բուշկովը մասնակցում է վարպետության դասերի և փառատոների Մուլին դ’Անդեում, Տրուայում և Բորդոյում (Ֆրանսիա), Վիտերբոյում (Իտալիա) և Նյու Հեմփշիրում (ԱՄՆ):

Մարկ Բուշկովն իր գործունեության ընթացքում արժանացել է մի շարք միջազգային մրցանակների: Դրանք նոր շունչ են հաղորդել երաժշտի կարիերային. հաղթել է առաջին մրցանակը հեղինակավոր Հենրի Կոխի անվան ջութակահարների միջազգային մրցույթում, ինչպես նաև Լայպցիգում 2010 թ. անցկացված European Young Concert Artists Audition-ում: Նույն տարում նա ստացել է առաջին մրցանակ (ջութակ) Փարիզի CNSM-ի ժյուրիի կողմից: Դրան 2011-ին հաջորդեց հեղինակավոր Ebel մրցանակը:

2012 թ.–ին նա դարձավ Եղիսաբեթ թագուհու անվան մրցույթի (Բրյուսել) եզրափակչի մասնակից և մրցանակակիր: 2013-ին հաղթեց առաջին մրցանակը Մոնրեալի միջազգային երաժշտական մրցույթում և Ջորջ Գարայի կողմից ճանաչվեց Stiftung Juventus-ի մրցանակակիր:

Մարկ Բուշկովի համերգային կարիերան բավականին սրընթաց էր: Անթիվ մենահամերգներՀամբուրգում, Մոնպելյե փառատոնի շրջանակում, Փարիզի Դե լա Վիլլ թատրոնում, «Երաժշտական օլիմպոս» միջազգային փառատոնի շրջանակում Սանկտ Պետերբուրգում և Մոնրեալում, համագործակցություն այնպիսի նվագախմբերի հետ, ինչպիսիք են Բելգիայի ազգային նվագախումբը, Լիեժի թագավորական ֆիլհարմոնիկ նվագախումբը, Լոձի ֆիլհարմոնիկը, Մոսկվայի ֆիլհարմոնիկը,Staatsorchester Rheinische ֆիլհարմոնիկը։

2014/15 համերգաշրջանում Մարկ Բուշկովը Համբուրգում առաջին անգամ հանդես եկավ NDR սիմֆոնիկ նվագախմբի հետ: Համերգաշրջանի կարևոր ելույթներից էր Բրամսի Ջութակի կոնցերտի կատարումը Դյուսելդորֆի սիմֆոնիկ նվագախմբի հետ՝ Deutsche Oper am Rhein-ի բալետային ներկայացումներից մեկի համար:

2014 թ.–ի դեկտեմբերին Մարիս Յանսոնսի հրավերով Բուշկովը հանդես է եկել Թագավորական Կոնցերտգեբաու նվագախմբի Essentials շարքի անդրանիկ համերգում:

Հիշեցնենք, որ Խաչատրյանի 5-րդ միջազգային փառատոնը կշարունակվի մինչև դեկտեմբերի 11-ը: Հայ հանդիսատեսը հնարավորություն կունենա վայելել հայ և արտերկրյա կոմպոզիտորների ստեղծագործություններ, հաղորդակիցը լինել դասական երաժշտության գոհարներին:–0–