Ընդդիմությունը բանդիտիզմի և բռնություն գործադրելու հրապարակային կոչեր է տեսել Փաշինյանի Facebook-յան աղմկահարույց գրառման մեջ

ԵՐԵՎԱՆ, 16 նոյեմբերի․ /Նովոստի-Արմենիա/․ «Բարգավաճ Հայաստան» խորհրդարանական ընդդիմադիր խմբակցությունը իրավապահ մարմինների ղեկավարներից պահանջել է հետաքննել Նիկոլ Փաշինյանի երեկվա Facebook-յան գրառումը՝ դրանում տեսնելով բանդիտիզմի և բռնություն գործադրելու հրապարակային կոչեր:

Խմբակցության անդամ Նաիրա Զոհրաբյանը Facebook-յան իր էջում հրապարակել է «Բարգավաճ Հայաստան» խմբակցության՝ ՀՀ ԱԱԾ տնօրենին, ՀՀ Ոստիկանության պետին, ՀՀ Գլխավոր դատախազին, ՀՀ  Հատուկ քննչական ծառայության պետին, ՀՀ  քննչական կոմիտեի նախագահին ուղղած մանակի պատճենը։

«Բարգավաճ Հայաստան» խմբակցությունը դիմում է ձեզ՝ իրականացնելու օրենքով սահմանված քայլեր և գործողություններ ՀՀ Վարչապետ Նիկոլ Փաշինյանի ֆեյսբուքյան հետևյալ գրառման առնչությամբ։ Հիշեցնենք, որր վերջինս նախօրեին գրել էր.  «Առաջնագծի զինվորների տասնյակ տեսանյութեր դիտեցի այսօր։ պշած եմ տղաների խորագիտությունից։ Տղերք՝ դուք ճիշտ եք։ Սպասում եմ ձեզ Երևանում։ Վերջնականորեն լուծելու պատերի տակ վնգստացողների հարցերը։ Հպարտ եմ ձեզանով»,- ասվում է գրառման մեջ։

ԲՀԿ-ում կարծում են, որ սույն գրառումն իր մեջ առերևույթ պարունակում է ՀՀ Քրեական օրենսգրքի 222 (Բանդիտիզմ) և 226.2 (Բռնություն գործադրելու հրապարակային կոչերը,  բռնությունը հրապարակայնորեն արդարացնելը կամ քարոզելը) հոդվածներով  քրեական գործ հարուցելու բոլոր հիմքերը:

«Վարչապետի պաշտոն զբաղեցնող անձն այլևս սպառնալիք է Հայաստանի ազգային անվտանգության և Հայաստանի հասարակության համար: Այդ պաշտոնին նրա մնալու յուրաքանչյուր օրը վտանգում է Հայաստանի Հանրապետության ինքնիշխանությունը: Հորդորում ենք ժամ առաջ ձեռնարկել իրավական քայլեր՝ օրենքի ուժով Նիկոլ Փաշինյանին մեկուսացնելու և երկրում սահմանադրական կարգը վերականգնելու համար»,- հայտարարում է «Բարգավաճ Հայաստանը»:-0-