«Ոսկեջրած» ալկոթեստերներ, թե՞ կոռուպցիոն ռիսկ

ԵՐԵՎԱՆ, 25 մարտի. /Նովոստի–Արմենիա/. «Թրասփարենսի ինթերնեյշնլ» հակակոռուպցիոն կենտրոնի փորձագետ Արտակ Մանուկյանն ուշագրավ փաստեր է ներկայացրել բյուջեից իրականացվող գնումների մասին, գրում է «Հայկական ժամանակ» թերթը։

Ըստ Մանուկյանի բերած փաստերից մեկի, ՀՀ ոստիկանությունը մարդու օրգանիզմում սպիրտի պարունակությունը չափող 45 հատ «ալկոթեստեր» սարք է ձեռք բերել` յուրաքանչյուրը մեկ միլիոն 98 հազար դրամով։ Փորձագետը պնդում է, որ դա շատ թանկ է, քանի որ, օրինակ, Ռուսաստանում դրա հատն արժե 4-8 հազար ռուբլի, այսինքն` 56-58 հազար դրամ։

«Թրասփարենսի ինթերնեյշնլ»–ի փորձագետը նույնիսկ կատակել էր` ասելով, թե ձեռք բերած ակլոթեստերները, հավանաբար, ոսկեջրած են։

Ոստիկանությունն արձագանքել է փորձագետի բերած փաստին, ասելով, որ վերջինս թյուրիմացության մեջ է գցել հասարակությանը։ «2015 թվականին ոստիկանությունը ձեռք է բերել Alcovisor yupiter մոդելի պրոֆեսիոնալ, ներկառուցված տպիչով 45 հատ լրակազմ, որի գինն իսկապես 1 մլն 98 հազար դրամ է, որի մեջ մտնում է նաև սարքի հայաֆիկացումը, ՀՀ ստանդարտներին համապատասխան` վերածրագրավորումը պատվիրատուի պահանջով, ինչպես նաև հարկերը, տուրքերը և այլ պարտադիր վճարները»,– պարզաբանել են ոստիկանությունում, ավելացնելով, որ այդ սարքը ՌԴ–ում արժե ոչ թե 4-8 հազար, այլ 70 հազար ռուբլի առանց բոլոր վերանշյալ ընթացակարգերի։

Պարբերականը, սակայն, թվաբանություն է ներկայացնում, որից պարզ է դառնում, որ նույնիսկ այդ բոլոր վճարումները և հայաֆիկացումը կատարելու դեպքում սարքը չէր կարող արժենալ 1 մլն 98 հազար դրամ, ընդգծելով, որ հայաֆիկացումը շատ ավելի էժան գործընթաց է, քան ներկայացնում է ոստիկանությունը։

Այսպիսով, ինչպես նշում է թերթը, «ոստիկանությունն իր բերած հակափաստարկներով ապացուցել է փորձագետի պնդումները և հաստատել, որ այս գնման մեջ, մեղմ ասած, կոռուպցիոն ռիսկ կա»,– նշվում է հոդվածում։ -0-