ԵՐԵՎԱՆ, 28 դեկտեմբերի./Նովոստի-Արմենիա/. Անհնազանդության բողոքի ակցիաները ամեն օր են լինելու, մինչև Նիկոլ Փաշինյանը չհեռանա, հայտնել է վարչապետի՝ ընդդիմության միասնական թեկնածու Վազգեն Մանուկյանը:
«Քաղաքը միշտ էլ այս իրավիճակում է լինելու, որովհետև այն, ինչ որ արվեց, ներել հնարավոր չէ, և և այն ինչ շարունակվում է, ամեն օրը կործանարար է Հայաստանի համար»,- հայտնել է Մանուկյանը լրագրողների հետ զրույցում երկուշաբթի անցկացվող հերթական բողոքի ակցիայի ընթացքում:
Ընդ որում նա կասկածի տակ դրեց այն, որ վարչապետը կգնա արտահերթ ընտրությունների:
«Նա դիտմամբ դաշտը ուզում է բաժանի կուսակցությունների՝ովքեր են համաձայն, ովքեր են՝ դեմ: Սովորական հնարք է՝ «հին-նոր», սև-սպիտակ, էլիտա-ժողովուրդ»,- նշել է նա:
Դեկտեմբերի 25-ին Փաշինյանը հայտնել էր ՀՀ վարչապետի պաշտոնը լքելու պատրաստակամության մասին և հրավիրել շահագրգիռ քաղաքական ուժերին խորհրդակցությունների 2021թ.-ին արտահերթ խորհրդարանական ընտրությունների անցկացնելու հարցով: Ընդ որում, վարչապետը նշել էր, որ «հիմա արդեն ակնհայտ է, որ վարչապետի հրաժարականի պահանջով ընդդիմադիր գործընթացը չարժանացավ ժողովրդի աջակցությանը»։
«Ոչ մի ընտրություն Նիկոլ Փաշինյանի գլխավորությամբ չի կարող լինել Հայաստանում»,- հայտնել է Մանուկյանը:
«Նախևառաջ, ինքը պետք է հեռանա, պետք է ձևավորվի կառավարություն, որը ինչ-որ ժամանակում գոնե ուշքի կբերի, կբարձրացնի մարտունակությունը մեր բանակի, գնա բանակցությունների՝ կամ եռակողմ, կամ Ադրբեջանի հետ սահմանների վերաբերյալ: Որովհետև այն, ինչ որ կատարվում է, խայտառակություն է, մեր շարունակում ենք տալ ու տալ: Այստեղ առանց որևէ բանակցությունների, առանց միջոզգային իրավունքի տրվում են սահմանները: Մինչև չվերջանա սա, նոր կառավարություն չի ստեղծվի, ընտրությունների մասին խոսելը անիմաստ է: Ընտրություններ դա նշանակում է նորից տրոհել Հայաստանը, ընտրությունը նշանակում է պայքար, բոլոր կուսակցությունները պետք է սկսեն պայքարել Այս իրավիճակում իմաստ ունի այդ պրոցցեսի մեջ մտնել: Մինչև ուշքի չգանք, չի կարելի այդպիսի բան անել»,- նշել է նա:
Մանուկյանն ընդգծել է, որ Փաշինյանին դավաճան չի համարում, այլ թշնամի:
«Իր օրոք Հայաստանը զարգացում ապրել չի կարող: Պատերազմում մենք պարտվեցինք, բայց էլի կարելի է ոտքի կանգնել, սակայն այն երևույթները, որոնք ինքը մտցրեց, այդ երևույթները կործանարար են Հայաստանի համար»,- ընդգծել է նա:
Մանուկյանի խոսքով, երկրում չկա ընդդիմություն և իշխանություն բաժանում՝ «սա քաղաքական պայքար չէ»
«Կա թշնամու իշխանություն և ժողովուրդ: Բայց այդ ամեն ինչից մեր ժողովուրդը դուրս կգա: «Ընդդիմություն» բառը օգտագործում են, երբ ընտրություններ են, երբ որ քաղաքական հայացքների տարբերությունկա: Իսկ հիմա չկա նման բան: Այժմ ազգային պայքար է մեր երկիրը թշնամուց փրկելու համար: Դրանից հետո մեր մեջ կլինեն քաղաքական պայքարներ, բայց նախևառաջ պետք է ազատվել թշնամիներից»,- ընդգծել է նա: -0-
