Վարչապետ. «Հայաստանի միջազգայնորեն ճանաչված սահմանները մնացել են և կմնան անձեռնմխելի»
ԵՐԵՎԱՆ, 14 դեկտեմբերի./Նովոստի-Արմենիա/. Նոյեմբերի 9-ի հայտարարության իրագործման որևէ փուլում Հայաստանի միջազգայնորեն ճանաչված սահմանները մնացել են և կմնան անձեռնմխելի, հայտարարել է ՀՀ վարչապետ Նիկոլ Փաշինյանը երկուշաբթի օրը Facebook-յան ուղիղ եթերով ժողովրդին դիմելիս:
«ՀՀ սահմանների անխախտելիության սկզբունքը որեւէ կերպ չի կարող կասկածի տակ դրվել: Բայց այս չլուծված հարցերը պետք է լուծել սառը, հանդարտ աշխատանքով»,- հայտնել է վարչապետը:
Նա նշել է, որ նոյեմբերի 9-ի հայտարարության մեջ Զանգելանի և Կուբաթլիի շրջանների մասին հիշատակում չի եղել, որովհետև հայտարարության ստորագրման պահին ցավոք դրանց 90 տոկոսից ավելին եղել է Ադրբեջանի վերահսկողության ներքո:
«Բանակցությունների ընթացքում եղել է ըմբռնում, որ այդ հատվածում պետք է տեղի ունենա սահմանագծերի ճշգրտում, ինչը շաբաթների ընթացքում պետք է իրականացվի: Այստեղ կան մեզ համար զգայուն հարցեր, եւ այդ հարցերի կառավարման շուրջ տեղի են ունենում ինտենսիվ բանակցություններ»,- նշել է վարչապետը:
Նրա խոսքով, այսօր տեղի ունեցող գործընթացները, որոնք երբեմն ցավոտ են, շատերը փորձում են օգտագործել նեղ քաղաքական նպատակներով:
«Ապատեղեկատվության հսկայական հոսքեր են դրվել շարժման մեջ: Դրանց մեծ մասը կառավարվում է արտերկրից, ու չենք կարող բացառել դրանց առնչությունը օտարերկրյա հատուկ ծառայությունների հետ»,- հայտնել է նա:
