ԵՐԵՎԱՆ, 8 հոկտեմբերի. /Նովոստի-Արմենիա/. Աշխատանքային այցով հոկտեմբերի 7-ին Սյունիք այցելած Նախագահ Սերժ Սարգսյանը մասնակցել է մարզում առաջին անգամ անցկացվող Սպարապետի օրվան նվիրված միջոցառումներին, հայտնում է նախագահի մամուլի ծառայությունը:
Երկրի ղեկավարը միջոցառումների շրջանակներում այցելել է Խնձորեսկ համայնքում գտնվող Մխիթար Սպարապետի գերեզմանին, ծաղիկներ դրել և հարգանքի տուրք մատուցել Սպարապետի հիշատակին, իսկ երեկոյան ներկա է գտնվել օրվա խորհրդի ներքո կազմակերպված գալա համերգին:
Խնձորեսկում Սպարապետի օրվան նվիրված բազմաբնույթ միջոցառումներն ուղեկցվել են ժողովրդական տոնախմբությամբ, երգ ու պարով, ավանդական տարբեր սպորտաձևերում մրցույթներով:
Սյունիքի մարզ կատարած այցի շրջանակներում Հանրապետության Նախագահն այցելել է Գորիսում գտնվող Ակսել Բակունցի տուն-թանգարան:
Նախագահին ներկայացրել են, որ 2012-2014 թվականների ընթացքում թանգարանում կատարվել են հիմնանորոգման աշխատանքներ, բարեկարգվել ու նորացվել է ցուցասրահը, ամբողջովին փոխվել են շարժական ցուցադրական վահանակները, ցուցափեղկերը, ավելացվել են նոր ցուցադրանմուշներ:
Հանրապետության նախագահը Գորիսում ծանոթացել է նաև հիմնանորոգվող «Գորիս» հյուրանոցի պայմաններին:
Մխիթար Սպարապետը Հայաստանի ազգային հերոս է: 1722-1725 թվականներին հայ ազգային-ազատագրական շարժման գործիչ Դավիթ Բեկը Մխիթար Սպարապետի օգնությամբ գլխավորել է սյունյաց հայերի և արցախահայերի զինված պայքարն Իրանի դեմ, ինչը հանգեցրել է պարսիկների արտաքսմանն Արևելյան Հայաստանից: Դավիթ Բեկի մահից հետո Մխիթար Սպարապետն ինքն է գլխավորել Սյունիքի ազգային-ազատագրական պայքարը: Սպանվել է դավադրության հետևանքով և թաղված է Խնձորեսկում: -0-
