Ստերլիգովը Ղարաբաղից վերադարձել է Մոսկվա, սակայն ընտանիքին իր հետ չի տարել

ԵՐԵՎԱՆ, 16 հուլիսի. /Նովոստի–Արմենիա/. Ռուս ձեռներեց Գերման Ստերլիգովը վերադարձել է Մոսկվա, հաղորդում է vesti.ru–ն։ Վերջերս նա ընտանիքի հետ միասին Ռուսաստանից տեղափոխվել էր Լեռնային Ղարաբաղ։

Նրա մեկնումը կապում են ԲՈՐՆ խմբավորման ազգայնամոլների գործի հետ։ Վարկածներից մեկի համաձայն` Ստերլիգովին պատկանող հողատարածքներում, իբր, տեղակայվել են ուսումնական ճամբարներ։

Գործարարը նախատեսում է Մոսկվայում անցկացնել մի քանի հանդիպում, որոնց արդյունքում որոշում կընդունի վերադառնալ Ռուսաստան, թե ոչ։

«Իմ այցը լրտեսություն է։ Ընտանիքիս թաքցրել եմ հուսալի բնի մեջ, իսկ ինքս եկել եմ տեսնելու` ամեն ինչ կարգին է, թե ոչ։ Հուսով եմ, որ այո։ Մենք ցանկանում ենք ապրել Ռուսաստանում, քանի որ ռուս ենք և մեզ շատ է դուր գալիս այստեղ», – ասել է Ստերլիգովը։

Նրա խոսքով` վերջերս Ռուսաստանում շատ հեշտ է զբաղվել գյուղական գործերով։ Ոչ ոք չի խանգարում, իսկ շրջանային և մարզային իշխանությունները միայն աջակցում են։

Գերման Ստերլիգովը էկսցենտրիկ ռուս ձեռներեց է, հայտնի ֆերմեր, նախկինում` «Ալիսա» բորսայի հիմնադիրը։ Հուլիսի սկզբին հայտնի դարձավ, որ նա «զմրսել» է Սլոբոդայում գտնվող իր հայտնի տունը, սկսել է վաճառել ունեցվածքն ու որդիների հետ Ռուսաստանից մեկնել Լեռնային Ղարաբաղ։ Ղարաբաղ տեղափոխվելուց հետո Ադրբեջանը Ստերլինգովին անցանկալի անձ է հայտարարել։ –0–