«ՌԻԱ Նովոստիի» ձերբակալված լրագրողներին բաց են թողել «Կիտայ-գորոդի» ՆԳԲ-ից

ԵՐԵՎԱՆ, 7 դեկտեմբերի. /Նովոստի-Արմենիա/. Մոսկվայի կենտրոնում «ՌԻԱ Նովոստիի» ձերբակալված լրագրողներին բաց են թողել «Կիտայ-գորոդ» ՆԳԲ-ից այն բանից հետո, երբ նրանք բացատրագիր են գրել, թե ինչ նպատակով են նկարահանում իրականացրել Չերկասյան փակուղում:

Թղթակից Յանա Մակարովան և ստաժոր Գրիգորի Նազարենկոն «ՌԻԱ Նովոստիի» տեսատեղեկատվության խմբագրության կողմից ուղարկվել էին մայրաքաղաքի հիմնական փողոցներում և հրապարակներում անվտանգության քայլերի ուժեղացման կամ դրա բացակայության իրավիճակի նկարահանման: Այն բանից հետո, երբ թղթակիցը սկսել է նկարահանել փողոցը բջջային հեռախոսով, նրան և ստաժորին մոտեցել են իրավապահ մարմինների աշխատակիցները և պահանջել ավտոմեքենա նստել, ինչից հետո տեղափոխել են նրանց «Կիտայ-գորոդ», հաղորդում է ՌԻԱ Նովոստին:

ՆԳԲ-ում Մակարովայից և Նազարենկոյից բացատրություն են վերցրել այն մասին, թե ինչ նպատակով են նրանք գտնվել Չերկասյան փակուղում և նկարահանում կատարել: Փաստաթղթերի՝ անձնագրերի և խմբագրության թղթակցական վկայականի ստուգումից հետո «ՌԻԱ Նովոստիի» լրագրողներին բաց են թողել:

Ընդդիմության արտոնված հանրահավաքը «Չիստիե պրուդի»-ում երկուշաբթի ավարտվել է դեպի Լուբյանկա կատարած չարտոնված երթով, ձերբակալվել է 300 մարդ: Երեքշաբթի խորհրդարանական ընտրությունների արդյունքներից դժգոհ ընդդիմությունը չարտոնված հանրահավաք է կազմակերպել Հաղթական հրապարակում: Վերջին տվյալներով, նույնպես 300 մարդ է ձերբակալվել: Հանրահավաքի մասնակիցները ոստիկանությանը մեղադրում են չաձազանց կոշտ գործողությունների մեջ, իրավապահներն ասում են, որ այսուհետ էլ կկասեցնեն չարտոնված ակցիաները, իսկ մասնակիցներին կենթարկեն պատասխանատվության:

Երկուշաբթի օրվա ակցիայի ժամանակ ձերբակալվել են մի քանի լրագրողներ, այդ թվում՝ Ռոյթերսի և Bloomberg-ի, «Իզվեստիա» թերթի և The New Times ամսագրի լրագրողներ, իսկ այնուհետև նրանց բաց են թողել:

Ռուսաստանի լրագրողների միությունը չորեքշաբթի պահանջել է արդյունավետ քննել լրագրողների ձերբակալման և ծեծի ենթարկելու դեպքերը բողոքի ակցիաների ժամանակ: -0-