ՌԴ զինվորականները 2012թ.-ի վերջին կկարողանան Ինտերնետի միջոցով առողջարան ընտրել

Ռուս զինվորականները կկարողանան 2012թ.-ի վերջին ինտերնետի օգնությամբ առողջարան և հանգստյան տուն ընտրել, ուղեգրերի առցանց պատվիրման համակարգի ստեղծմամբ այժմ զբաղվում է ՌԴ պաշտպանության նախարարության առողջարանային հանգստի ապահովման դեպարտամենտը, «Էխո Մոսկվի» ռադիոկայանին տված հարցազրույցում տեղեկացրել է դեպարտամենտի ղեկավար Ելենա Չուֆիրյովան, հաղորդում է «ՌԻԱ Նովոստին»:

«Նման տեխնիկական առաջադրանք արդեն կա, և հաջորդ տարվա վերջին Պոդմոսկովիեում փորձնական նախագծերը պետք է գործի դրվեն»,- ասել է նա:

Չուֆիրյովան նշել է, որ նախարարությունը 20 հազար մարդու համար նախատեսված ավելի քան 50 առողջավայր ունի: Ըստ նրա՝ օրական գերատեսչության առողջարաններում և հանգստյան տներում ավելի քան 300 հազար զինծառայող, զինվորական թոշակառու և նրանց ընտանիքի անդամներն են  հանգստանում:

Նա նաև տեղեկացրել է, որ զինվորականների համար ուղեգրերի գները մի փոքր աճել են, դրանց մասին տեղեկատվությունը տեղադրված է ՊՆ կայքում: Միաժամանակ արտոնությունները պահպանվել են՝ զինծառայողն ուղեգրի համար վճարում է արժեքի 25 տոկոսը, զինվորականի ընտանիքի անդամը՝ 50 տոկոս, մի շարք կարգի անձինք անվճար են ստանում  ուղեգրերը:

ՊՆ-ն հնարավորություն ունի զինծառայողներին արտերկիր հանգստի ուղարկելու, նաև նշել է դեպարտամենտի ղեկավարը: «Դա Ուկրաինան է, Ղրիմը, որտեղ տեղակայված է «Յալթա» առողջարանը, և Աբխազիան, որտեղ գտնվում են մեր երկու առողջարանները»,- ասել է նա: -0-