ՌԴ միլիցիան կազմել է Նովոսիբիրսկում բնակվող քանդակագործ Արամ Գրիգորյանի վրա հարձակման մեջ կասկածվող երկու անձանց ֆոտոռոբոտները, Արամ Գրիգորյանը հայտնի է քաղաքային և մարզային իշխանությունների դեմ իր սկանդալային ելույթներով, հինգշաբթի ՌԻԱ Նովոստիին է տեղեկացրել շրջանային ՆԳԳՎ-ի աղբյուրը:
Գրիգորյանը հարձակման է ենթարկվել երեքշաբթի քաղաքի կենտրոնական փողոցներից մեկում: Աշխատավայր գնալու ճանապարհին նրա վրա էին հարձակվել երկու անհայտ անձինք և ծեծի ենթարկել, ինչից հետո փախուստի էին դիմել: Տուժողն ինքն էր եկել միլիցիայի հերթապահ բաժին և հանցագործության մասին հայտարարություն ներկայացրել:
«Տուժածի ցուցմունքներով կազմվել են կասկածյալների ֆոտոռոբոտները, որոնց որոնմամբ զբաղվում է միլիցիայի անձնակազմը», - ասել է գործակալության զրուցակիցը:
Նա նաև տեղեկացրել է, որ չորեքշաբթի Նովոսիբիրսկի ՆԳՎ-ի միլիցիայի թիվ 1 բաժինը հարձակման փաստով հարուցել է քրեական գործ ՌԴ ՔՕ 116-րդ հոդվածի երկրորդ մասի հատկանիշներով (ծեծի ենթարկել), որով նախատեսվում է մինչև երկու տարի ազատազրկում:
Միլիցիան կարծում է, որ հանցագործությունը կատարվել է «խուլիգանական դրդապատճառներով» և դեռ չի կապում քանդակագործի վրա հարձակման փաստը նրա հասարակական և մասնագիտական գործունեության հետ:
Սակայն Գրիգորյանը համոզված է, որ նրան ցանկացել են սպանել: Նրա խոսքով՝ հարձակվողներից մեկի ձեռքում մետաղե կաստետ է եղել, որով չարագործները հարվածել են քանդակագործի քունքին:
Գրիգորյանի պնդում է, որ իրեն զննած բժիշկներն ասել են, որ դա կարող էր մահացու հարված լինել:
Տուժածը նաև հայտարարել է, որ հարձակումը կապում է քանդակներից մեկի վրա իրականացրած աշխատանքի հետ, որը նա պատրաստել է, սակայն պատվիրատուից այդպես էլ հեղինակային հոնորար չի ստացել, որը, նրա պնդմամբ, կազմում է 24,5 մլն ռուբլի:
Չարագործները ոչինչ նրանից չեն վերցրել, ինչը, ըստ Գրիգորյանի, կարող է վկայել այն մասին, որ նրանք նպատակ չունեին կողոպտել իրեն:
Քանդակագործը նշել է, որ հրաժարվել է ստացիոնար բուժումից, սակայն խոստովանել է, որ իրեն այդքան էլ լավ չի զգում, իսկ դեմքին հասցված հարվածներից հեմատոմաներ են առաջացել:
Ռուսաստանի գեղարվեստի ակադեմիայի թղթակից-անդամ Գրիգորյանը Նովոսիբիրսկում հանրաճանաչ է դարձել ոչ թե ստեղծագործական աշխատանքների շնորհիվ, այլ «Ավազակային Նովոսիբիրսկ» անվանմամբ տեսանյութերը նախորդ տարի ինտերնետում ներկայացնելուց հետո, որոնցում քանդակագործը զգացմունքային կերպով պատմում է պաշտոնյաների, նրա կարծիքով, անօրինական գործողությունների մասին:-0-
