Ավիացիոն իշխանությունները խոստանում են, որ հնարավորին չափ շուտ կվերացնեն մոսկովյան օդանավակայաններում առկա կաթվածային վիճակը

Ռոսավիացիան մտադիր է կարգավորել «Դոմոդեդովո» օդանավակայանում ստեղծված իրավիճակը, որտեղ եղանակային վատ պայմանների պատճառով տասնյակ չվերթեր են հետաձգվել և հազարավոր ուղևորներ են կուտակվել երկու-երեք օրվա ընթացքում, լրագրողներին է հայտնել գերատեսչության ղեկավար Ալեքսանդր Ներադկոն։

Երեքշաբթի լույս գիշերը նա օպերատիվ շտաբի հրատապ խորհրդակցություն է անցկացրել  «Դոմոդեդովո» օդանավակայանում։ Արդեն երեքշաբթի իրավիճակը զգալիորեն բարելավելու մտադրության մասին են հայտարարում Շերեմետևոյում, հաղորդում է ՌԻԱ Նովոստին։

Մայրաքաղաքում նախորդ շաբաթ տեղացած «սառցե անձրևը» քաոս է առաջացրել մոսկովյան օդանավակայաններում, որտեղ հարյուրավոր չվերթեր են հետաձգվել և հազարավոր ուղևորներ են հավաքվել։ Ռուսաստանի տուրօպերատորների ասոցիացիայի տվյալներով, ավելի քան 20 հազար ուղևոր է մնացել օդանավակայաններում, միայն Շերեմետևոյում թռիչքի է սպասել յոթ հազար մարդ։

«Մենք հույս ունենք կարգավորել իրավիճակն առաջիկա երկու-երեք օրվա ընթացքում»,- ասել է Ներադկոն՝ ավելացնելով, որ ամենամեծ ծավալի աշխատանքը կիրականացվի երեքշաբթի։

Ներադկոյի խոսքով՝ Դոմոդեդովոն առաջիկա օրերին կսպասարկի 350 մեկնման չվերթ, որոնցից դեկտեմբերի 28-ի 250 չվերթ և դեկտեմբերի 26-ի և 27-ի ևս հարյուր չվերթ։ -0-