Ղարաբաղյան հակամարտության բանակցություններն առանց Ստեփանակերտի ներգրավման անօգուտ են. Ռազմական կանխատեսման կենտրոնի ղեկավար

Ղարաբաղյան հակամարտության կարգավորման բանակցություններն առանց Ստեփանակերտի ներգրավման ոչինչ չեն նշանակում, հինգշաբթի մամուլի ասուլիսի ժամանակ ասաց Քաղաքական և ռազմական վերլուծության ինստիտուտի Ռազմական կանխատեսման կենտրոնի ղեկավար, գնդապետ Անատոլի Ցիգանոկը։

«Ինչ էլ որ քննարկվի Հայաստանի և Ադրբեջանի նախագահների բանակցությունների ժամանակ, առանց Ստեփանակերտի համաձայնության դրանք ոչ մի արդյունք չեն տա»,- նշեց նա։

Ըստ փորձագետի՝ պարզապես անհրաժեշտ է բանակցային գործընթացում երրորդ կողմ ներգրավել՝ ԼՂՀ-ին, հակառակ դեպքում բանակցություններն անվավեր կլինեն։

Այսօր, ինչպես նշեց Ցիգանոկը, ԼՂՀ-ի ճանաչման մասին խոսելիս պետք է հաշվի առնել, որ գործարկվել է պետական կազմավորումների ճանաչման գործընթացը, և ԼՂՀ-ի համար նախադեպեր են ստեղծվում, որոնք միջազգային ճանաչում ստանալու նոր հնարավորություններ են բացում՝ Ադրբեջանի կամքին հակառակ։

ՄԱԿ-ի Միջազգային դատարանը հուլիսի 22-ին խորհրդակցական եզրակացություն է կայացրել, ըստ որի՝ Կոսովոյի անկախության ինքնահռչակումը չի հակասում միջազգային իրավունքի նորմերին: Դատարանը կարծում է, որ միջազգային իրավունքն անկախության հռչակման որևէ տեսանելի արգելք չի պարունակում:

Կոսովոյի միջազգային ճանաչումից բացի մի շարք երկրներ ճանաչել են Աբխազիայի և Հարավային Օսեթիայի անկախությունը։

Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:

Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրին նրան, որ նրանք կորցրեցին վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:

1994թ. մայիսի 12-ին զինադադարի վերաբերյալ եռակողմ համաձայնագրի կնքումից  հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ եղավ շուրջ 25-30 հազար զոհ և մոտ մեկ միլիոն մարդ  ստիպված լքեց բնօրրանը:

Հրադադարի ռեժիմ հաստատելու վերաբերյալ համաձայնագիրը մինչև այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան: -0-