Եվրո-2012 գովազդային արշավը մեկ տարի անց կսկսվի Ուկրաինայում

ԵՐԵՎԱՆ, 16 սեպտեմբերի. /Նովոստի-Արմենիա/. Ուկրաինայում 2012թ.-ի Ֆուտբոլի Եվրոպայի առաջնության գովազդային արշավը հավանաբար կսկսվի 2011թ.-ի աշնանը, հայտնեց Եվրո-2012 հարցերով Ուկրաինայի փոխվարչապետ Բորիս Կոլեսնիկովը, հաղորդում է «ՌԻԱ Նովոստին»։

Նա նշեց, որ գովազդային արշավը կանցկացվի ՈՒԵՖԱ-ի հովանու ներքո։ «Այս քաղաքները պետք է հագնվեն Եվրո-2012-ի գույներով։ Համապատասխանաբար, ճանապարհները, տրոլեյբուսները, ավտոբուսները՝ դա մեծ աշխատանք է։ Չի կարելի ասել, որ այն մեկ օրում կսկսվի»,- Դոնեցկում ասաց Կոլեսնիկովը։

Փոխվարչապետը նշեց, որ Դոնեցկում «Եվրո-2012» լոգոտիպով ավտոբուսների ստեղծման աշխատանքն արդեն սկսվել է։ Ըստ նրա՝ նման գովազդային արշավն ավելի շատ կզարդարի ուկրաինական քաղաքները, քան կնպաստի մրցախաղերի տոմսերի վաճառքին։

2012թ.-ի Եվրոպայի առաջնությունը տեղի կունենա Լեհաստանում և Ուկրաինայում (Կիևում, Խարկովում, Դոնեցկում և Լվովում)։ -0-