ԵՐԵՎԱՆ, 29 հունիսի./Նովոստի-Արմենիա/. Վրաստանի նախագահ Միխայիլ Սահակաշվիլին Ռուսաստանի հետ առանց որևէ պայմանների կարգավորման մասին լայնածավալ երկխոսություն ծավալելու պատրաստակամություն է հայտնել, որն իրեն հերթին նախատեսում է բռնի տեղահանված անձանց վերադարձը Աբխազիա և Հարավային Օսեթիա, հաղորդում է «ՌԻԱ Նովոստին»։
«Մեր կողմից ուզում եմ հաստատել առանց որևէ պայմանի կարգավորման մասին լայնածավալ երկխոսություն ծավալելու մեր լիարժեք պատրաստակամությունը։ Կարգավորումը նախատեսում է մոտ 500 հազար վրացի փախստականների վերադարձն իրենց տները»,- երեքշաբթի ԱԽ նիստի ժամանակ հայտնեց Սահակաշվիլին՝ նշելով, որ վրացի փախստականներ ասելով նկատի ունի էթնիկ վրացիներին, աբխազներին, հայերին, հրեաներին, հույներին, ուկրաինացիներին, էստոնացիներին և այլ էթնիկ խմբերի ներկայացուցիչների, ովքեր լքել են տվյալ տարածքը։
«Ռուսաստանի հետ առճակատման որևէ հետաքրքրություն չունենք։ ՄԵնք պատրաստ ենք երկխոսություն տանել նրանց հետ, այդ թվում Ռուսաստանի ղեկավարության հետ... Մենք նրանց որպես բանակցությունների գործընկեր ենք ճանաչում։ Ցանկանում ենք նրանց հետ ցանկացած բանակցություն տանել՝ հաշվի առնելով այն, որ Վրաստանը պետք է ճանաչվի որպես միասնական, ինքնիշխան, անկախ երկիր, որը ցանկանում է նրանց գործընկերը լինել»,- նշեց Սահակաշվիլին։
2008թ. օգոստոսի 8-12-ը Վրաստանը ռազմական օպերացիա իրականացրեց Հարավային Օսեթիայում։ Վրացական զորքերը գրեթե ամբողջովին ավերեցին հանրապետության մայրաքաղաք Ցխինվալը: Ռուսաստանը, պաշտպանելով, Հարավային Օսեթիայի բնակիչներին, որոնցից շատերը Ռուսաստանի քաղաքացիություն ընդունեցին, զորք մտցրեց հանրապետություն և 5-օրյա ռազմական գործողություններից հետո դուրս մղեց վրացական զորքը տարածաշրջանից: 2008 թ.-ի օգոստոսի 26-ին Ռուսաստանը ճանաչեց Հարավային Օսեթիայի և Աբխազիայի անկախությունը։ Ի պատասխան դրան՝ Թբիլիսին խզեց դիվանագիտական հարաբերությունները Մոսկվանի հետ և երկու անդրկովկասյան հանրապետությունները օկուպացված տարածքներ հայտարարեց։-0-
