Մոսկվայում հուսով են, որ Հայաստանին և Թուրքիային կհաջողվի հաղթահարել ներկայիս բարդ իրավիճակն ու հարաբերությունների լիակատար կարգավորման պայմաններ ստեղծել, ասվում է ՌԴ ԱԳՆ պաշտոնական ներկայացուցիչ Անդրեյ Նեստերենկոյի հաղորդագրության մեջ, հաղորդում է «ՌԻԱ Նովոստին»։
Դիվանագետը հիշեցրել է, որ հինգշաբթի հեռուստատեսային ուղերձում ՀՀ նախագահ Սերժ Սարգսյանը Թուրքիայի հետ հարաբերությունների կարգավորման շարունակական բանակցությունների անմխիթար հանրագումարն է ներկայացրել և հայտարարել գործի փակուղային վիճակի մասին։ Միաժամանակ նա ընդգծել է, որ Հայաստանը ընդամենը կասեցնում է արձանագրությունների վավերացումը, բայց ետ չի կանչում իր ստորագրությունը փաստաթղթի տակից: Այսպիսով՝ մեկ տարի առաջ սկսված Հայաստանի և Թուրքիայի միջև հարաբերությունների կարգավոման հեռանկարը պահպանվում է։
«Արձանագրում ենք, որ տվյալ փուլում Հայաստանին և Թուրքիային չի հաջողվել այնպիսի արդյունք ցուցաբերել, որը թույլ կտար վերականգնել երկու հարևան պետությունների միջև հարաբերությունները և այդպիսով կազդուրել Անդրկովկասի քաղաքական մթնոլորտը, նախադրյալներ ստեղծել այդ տարածաշրջանում կայունության ամրապնդման համար։ Հույս ենք հայտնում, որ երկու երկրներին կհաջողվի հաղթահարել ներկա բարդ իրավիճակը և պայմաններ ստեղծել հարաբերությունների լիակատար կարգավորման համար, ինչով շահագրիռ են տարածաշրջանի բոլոր պետությունները»,- ասել է Նեստերենկոն։
Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։ Հարաբերությունները բարդացան, երբ Անկարան սկսեց սատարել ադրբեջանական դիրքորոշմանը՝ ղարաբաղյան հարցում, և երբ Թուրքիան կտրուկ արձագանքեց Օսմանյան կայսրությունում 1915թ. հայոց ցեղասպանության միջազգային ճանաչման գործընթացին: Հայաստանի և Թուրքիայի՝ մինչև վերջին ժամանակները բավականին լարված հարաբերությունները սկսեցին կարգավորվել, երբ երկու երկրի արտգործնախարարներ Էդվարդ Նալբանդյանն ու Ահմեդ Դավութօղլուն հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»: Փաստաթղթերը ստորագրումից հետո պետք է հավանության արժանանան երկու երկրների խորհրդարանների կողմից:--0--
