ԵՐԵՎԱՆ, 12 ապրիլի. /Նովոստի-Արմենիա/. «Լոմոնոսով 2010» միջազգային երիտասարդական գիտական համաժողովը կանցկացվի 2010 թ.-ի ապրիլի 12-15-ը Մոսկվայի Լոմոնոսովի անվան պետական համալսարանում, «Նովոստի-Արմենիա» գործակալությանը տեղեկացրեց Հումանիտար համագործակության միջպետական հիմնադրամի մամուլի քարտուղար Ալեքսանդր Կալուգինը:
Երրորդ տարին է արդեն համաժողովն անցկացվում ԱՊՀ մասնակից-պետությունների Հումանիտար համագործակության միջպետական հիմնադրամի աջակցությամբ:
«Լոմոնոսովը», որն այս տարի անցկացվում է որպես ԱՊՀ երկրների գիտության և նորարարությունների երիտասարդական համաժողով, կդառնա ԱՊՀ երկրների գիտության և նորարարությունների տարվա առաջին խոշոր միջոցառումը, որն անցկացվում է Համագործակության երկրների ղեկավարների որոշմամբ:
Համաժողովի ծրագրում ներառված է 33 սեկցիա, որոնք անցկացվում են ՄՊՀ-ի գրեթե բոլոր ֆակուլտետներում՝ սկսած հոգեբանական և փիլիսոփայական ֆակուլտետներից մինչև մաթեմատիկայի և ֆիզիկայի ֆակուլտետները, ինչպես նաև «ԱՊՀ. երիտասարդության հայացք» հատուկ միջճյուղային սեկցիան, ԱՊՀ երիտասարդ գիտնականների նորարարական նախագծերի ցուցահանդեսը, երկու միջազգային կլոր սեղանները՝ «ԱՊՀ. նորարարական ապագա. գիտություն, տեխնոլոգիաներ և կրթություն» և «Հայրենական մեծ պատերազմի դասերն ու նրա նշանակությունը ԱՊՀ ժողովուրդների ապագայի համար» միջազգային կլոր սեղանը, որը նվիրված է մայիսի 9-ին նշվող Մեծ հաղթանակի 65-ամյակին: Համաժողովի շրջանակներում առաջին անգամ կանցկացվի «ԱՊՀ. միասնական նորարարական տարածք» բացառիկ կրթական խաղը:
ՄՊՀ-ում պարբերաբար անցկացվող հռչակավոր ռուս գիտնականի անունը կրող երիտասարդ գիտնականների ապրիլյան հավաքները սկսվել են դեռ 1994 թ.-ին:
Համաժողովի բացման արարողությանը կմասնակցեն ԱՊՀ երկրների և ԵվրԱզԷՍ-ի միջպետական մարմինների ղեկավարները, պատգամավորներ, ԱՊՀ երկրների կրթության և գիտության նախարարությունների ներկայացուցիչները, դիվանագետներ, հայտնի գիտնականներ և հազարավոր երիտասարդ գիտնականներ:-0-
