Առաջին հայկական տեղեկատվական զվարճալի «ՏՎ Արմենիա ռու» ալիքը եթեր կհեռարձակվի Ռուսաստանի տարածքում 2010 թ. սեպտեմբերի 1-ից:
Ինչպես նշվում է հեռուստաալիքի պաշտոնական կայքում, հեռուստաալիքի գլոբալ նպատակն է լուսաբանել հայերի ակտիվ մասնակցությունը համաշխարհային հասարակական, քաղաքական և այլ իրադարձություններում, որոնք ուղղակիորեն կապված են ինչպես ԱՊՀ, Ասիայի, Եվրոպայի և Ամերիկայի երկրներում հայ ժողովրդի սոցիալտնտեսական զարգացման հետ, այնպես էլ խորը պատմամշակութային ժառանգության հետ, որն ունեցել և ունի հայ ազգը մարդկության զարգացման պատմության մեջ:
Հեռուստաալիքի հիմնական խնդիրներն են Հայաստանի և Ռուսաստանի տարածքում, ինչպես նաև այլ երկրներում բնակվող հայերի հասարակական, մշակութային, քաղաքական և տնտեսական կյանքի օպերատիվ լուսաբանումը, ինչպես նաև միասնական տեղեկատվական կամրջի ստեղծումը, որը միավորում է հայերի հասարակական հետաքրքրությունները ողջ աշխարհում:
«Հեռուստաալիքը պետք է հեռարձակվի և հայերի աճող սերնդի շրջանում սերմանի ժողովրդի լավագույն գծերն ու արարքները, ժողովուրդ, որը չնայած բազմադարյա հալածանքներին, կորուստներին և ցեղասպանությանը՝ կարողացել է պահպանել հարուստ մշակույթը, լեզուն, հավատքը, իմաստուն ավանդույթները և հայրենիքը՝ վերադարձնելով անկախ հանրապետության կարգավիճակը: Հայ ժողովուրդը հաղթահարեց ամեն ինչ, նույնիսկ անհաղթահարելի թվացող դժվարությունները սեփական յուրօրինակ կենսունակության, լավատեսության, հումորի հատուկ զգացողության և աշխատասիրության շնորհիվ», - ասվում է հեռուստաալիքի կայքում:
Հեռուստաալիքը ծրագրում է հեռարձակել լրատվական, սոցիալական, կրոնական, զվարճալի և երաժշտական ծրագրեր: Թեմատիկ բաժինների թվում կարելի է նշել նաև վավերագրական, ճանաչողական, հեղինակային, վերլուծական ծրագրերը:
Ընկերության հեռուստածրագրերի ցանցում կընդգրկվեն նաև տնտեսական, ֆինանսական, մարզական, երիտասարդական թեմաներն արծարծող ծրագրեր, ինչպես նաև նախատեսված է ցուցադրել ֆիլմեր, թատերական բեմադրություններ, ռուսաստանցի հայազգի հայտնի մշակութային, քաղաքական, հասարակական գործիչների հետ հարցազրույցներ:
Հեռուստաալիքի տվյալների համաձայն՝ Ռուսաստանի տարածքում բնակվող 143 միլիոն մարդուց 2,5 տոկոսը հայեր են:
«ՏՎ Արմենիա ռու» հեռուստաալիքն ունի պաշտոնական կայք՝ http://www.tvarmenia.ru: «ՏՎ Արմենիա ռու»-ն միջին մակարդակի ժամանակակից, թվային հեռուստաալիք է, որն ազդանշան է փոխանցում արբանյակային, մալուխային և ինտերնետ ցանցերին (Մոսկվայում դրանց թիվը մոտավորապես 10 է, Ռուսաստանի մարզերում՝ 200-ը):-0-
