Ռուսաստանի նախագահ Դմիտրի Մեդվեդևը շաբաթ՝ դեկտեմբերի 26-ին, շնորհավորել է ԽՍՀՄ ժողովրդական արտիստ Միխայիլ Բոյարսկուն 60-ամյակի կապակցությամբ, տեղեկացրել է Կրեմլի մամուլի ծառայությունը։
«Ձեզ` որպես գրավիչ, եռանդուն արտիստի և բազմակողմանի տաղանդավոր մարդու, անկեղծորեն սիրում են մեր երկրի միլիոնավոր հանդիսատեսներ։ Եվ թատրոնում, և կինոյում Դուք բացահայտել եք ձեր տաղանդը ամենատարբեր ժանրերում՝ խաղալով տասնյակ զանազան դերեր։ Ունենալով իսկապես անսպառ էներգիա և աշխատունակություն՝ Դուք այսօր էլ ուրախացնում եք ձեր բազմաթիվ երկրպագուներին»,- ասվում է փաստաթղթում։
Բոյարսկու հոբելյանի նախօրեին Կրեմլի մամուլի ծառայությունը հայտնել է, որ նախագահ Դմիտրի Մեդվեդևն իր հրամանագրով հայրենական թատերական և կինեմատոգրաֆիական արվեստի զարգացման գործում ունեցած մեծ ավանդի համար արտիստին պարգևատրել է «Հայրենիքի առջև ունեցած վաստակի համար» IV աստիճանի շքանշանով։
Իր 60-ամյակը Բոյարսկին կտոնի Լենսովետի անվան թատրոնի բեմում «Խառը զգացմունքներ» ներկայացում-բենեֆիսով։ -0-
