«Կինոշոկի» հիմնական մրցույթը ուրբաթ կշարունակեն հայկական և ռուս-ղազախական ֆիլմերը

ԵՐԵՎԱՆ, 18 սեպտեմբերի. /Նովոստի-Արմենիա/. Հարություն Խաչատրյանի «Սահման» ֆիլմը և Մարատ Սարուլուի «Հարավային ծովերի երգը» ռուս-ղազախական ֆիլմը ուրբաթ կշարունակեն ԱՊՀ երկրների, Լատվիայի, Լիտվայի և Էստոնիայի երկրների «Կինոշոկ» կինոյի 18-րդ բաց փառատոնի հիմնական մրցույթը, հաղորդում է «ՌԻԱ Նովոստին»:

«Սահման» ֆիլմը վավերագրական-պոետական մտորում է ազգամիջյան հակամարտությունների էության, մարդկանց և ժողովուրդներին բաժանող սահմանների մասին: Ֆիլմը նկարահանել է «Ոսկե ծիրան» երևանյան միջազգային կինոփառատոնի հիմնադիր և գլխավոր տնօրեն Հարություն Խաչատրյանը:

Ֆիլմի պատումի կենտրոնում սահմանամերձ ֆերմա է, իսկ պատմության գլխավոր «հերոսուհին» մատակն է: Սա փառատոնի առանց խոսքի ծրագրում ընդգրկված երկու ֆիլմերից մեկն է: Առանց խոսքի երկրորդ ֆիլմը՝ Երմեկ Տուրսունովի «Քելինը», կցուցադրվի շաբաթ օրը:

«Հարավային ծովերի երգը» միջազգային կինոփառատոնների մասնակից և դափնեկիր, Սցենարիստների և ռեժիսորների բարձրագույն դասընթացների անիմացիոն ռեժիսուրայի բաժնի շրջանավարտ Մարատ Սարուլուի աշխատանքն է:

Ֆիլմի գործողությունները տեղի են ունենում ղազախական փոքրիկ գյուղում: Հասանը ղազախ է, իսկ նրա հարևան Իվանը՝ ռուս: Իվանի մոտ ծնվում է թուխ զավակ, իսկ կես տարի անց Հասանը դառնում է շիկահեր փոքրիկի հայր: Կասկածները ստիպում են հարևաններից յուրաքանչյուրին պարզել սեփական գերդաստանի պատմությունը, նրանք ճամփա են ընկնում անեզր տափաստաններով՝  փնտրելու ճշմարտությունը:

«Ֆորմատից դուրս» մրցութային ծրագրում հանդիսատեսին կներկայացվեն Արբո Տամիքսաարի «Ֆրիցներն ու շիկահերները» էստոնալատվիական ֆիլմն ու Անդրեյ Սիլվեստրովի «Ուղեղը» ֆիլմը:

Կինոնախագծերի մրցույթը կշարունակեն «Տունը» և «Արևը՝ ընդամենը 24 ժամ» ֆիլմերը:

«Շոկի սահմանները» կարճամետրաժ ֆիլմերի մրցույթում ժյուրիի և հանդիսատեսի դատին կհանձնվեն Իվան Տվերդովսկու «Ասես ավտոբուսի եմ սպասում», Անդրեյ Ժիդկովի «Այն, ինչ ես ունեմ», Ալեքսանդր Կարգալցևի «Ջրհորը», Օքսանա Բուրայայի «Խոստովանություն» ֆիլմերը:-0-