ՀԱՊԿ-ն մտադիր է այսուհետ ևս անցկացնել համատեղ լայնամասշտաբ վարժանքներ. Բորդյուժա

Հավաքական անվտանգության պայմանագրի կազմակերպությունը մտադիր է շարունակել համատեղ լայնամասշտաբ վարժանքները, հինգշաբթի հայտարարեց ՀԱՊԿ գլխավոր քարտուղար Նիկոլայ Բորդյուժան Մոսկվա-Երևան տեսակամուրջի ժամանակ։ 

Պատասխանելով «Նովոստի-Արմենիա» գործակալության հարցին Հայաստանի տարածքում ՀԱՊԿ վարժանքների անցկացման հնարավորության վերաբերյալ նախորդ տարի «Ռուբեժ-2008» հրամանատարաշտաբային վարժանքների օրինակով՝ Բորդյուժան ասաց, որ այն դեպքում, եթե հայկական ղեկավարությունը նման ցանկություն արտահայտի, ապա հաջորդ տարի նմանատիպ վարժանքներ հանրապետությունում կանցկացվեն։

«Ամեն դեպքում մենք համապատասխան մոտեցումներ ունենք այս առումով։ Մենք նման լայնամասշտաբ վարժանքներ անցկացնում ենք երկու ատրին մեկ անգամ, ինչը կապված է այդ թվում նաև ֆինանսական խնդիրների հետ։ Բայց միանշանակ այդ վարժանքները կանցկացվեն նաև հետագայում»,- նշեց Բորդյուժան։

Միաժամանակ նա նշեց, որ 2009 թվականին ՀԱՊԿ-ն նախատեսում է վարժանքներ անցկացնել Բելառուսում և Ղազախստանում։ -0-