ՀԱՊԿ գլխավոր քարտուղարն ակնկալում է, որ Մինսկը շուտով կստորագրի ԱԱՀՈՒ ստեղծման մասին համաձայնագիրը
ԵՐԵՎԱՆ, 6 օգոստոսի. /Նովոստի-Արմենիա/. Բելառուսը և Ուզբեկստանը, որոնք դեռևս չեն միացել ՀԱՊԿ արագ արձագանքման ուժերի ստեղծման համաձայնագրին, ընդհանուր առմամբ համաձայն են դրա գործունեության հայեցակարգի հետ, թեև ունեն մի շարք դիտողություններ, հինգշաբթի «ՌԻԱ Նովոստիում» կայացած մամուլի ասուլիսում հայտարարեց ՀԱՊԿ գլխավոր քարտուղար Նիկոլայ Բորդյուժան։
«Բելառուսական կողմը պատրաստ է եղել ստորագրել այդ համաձայանգիրը (ԱԱՀՈՒ ստեղծման վերաբերյալ)։ Ավելին՝ Մինսկում տեղի ունեցած Անվտանգության խորհրդի քարտուղարների կոմիտեի նիստում այդ երկիրը հավանություն տվեց համաձայնագրի նախագծին։ Բացի այդ, բելառուսական կողմը առաջարկություններ ներկայացրեց ԱԱՀՈՒ կազմի մասին։ Ես կարծում եմ, որ Բելառուսի չստորագրելը ընդամենը տեխնիկական խնդիր է, և առաջիկայում այն կվերացվի»,- ասաց Բորդյուժան, հաղորդում է «ՌԻԱ Նովոստին»։
Մեկնաբանելով օգոստոսի մեկին Ղրղզստանում անցկացված ՀԱՊԿ ոչ պաշտոնական գագաթնաժողովի արդյունքները՝ նա հայտնեց, որ Մինսկը երբևէ կասկածներ չի արտահայտել ԱԱՀՈՒ ստեղծման նպատակահարմարության վերաբերյալ և «այդ նախագիծը չի համարում վնասակար»։
Ինչ վերաբերում է Ուզբեկստանի դիրքորոշմանը, ՀԱՊԿ գլխավոր քարտուղարը նշեց, որ Տաշքենդը ստորագրել է Հավաքական անվտանգության խորհրդի որոշումը ԱԱՀՈՒ ստեղծման մասին, բայց՝ հատուկ կարծիքով։
«Ուզբեկստանը կարծիք է արտահայտել այն կապակցությամբ, որ պատրաստ է քննարկել ԱԱՀՈՒ ստեղծման հարցը զորամիավորումներից, բայց դեմ է ԱԱՀՈՒ կազմում հատուկ նշանակության հակաահաբեկչական ուժերի ընդգրկմանը»,- ասաց նա։
Բորդյուժան ընդգծեց, որ Ուզբեկստանը չի խոչընդոտում ԱԱՀՈՒ ստեղծման համաձայնագրի ստորագրմանը և չի առարկում դրա դեմ, բայց մասնակցել «այն ձևով, ինչպես որ համաձայնագիրը մշակվել է, չի ծրագրում»։
