«Եվրատեսիլի» եզրափակիչը դիտել են ռուսների մեկ երրորդից քիչ ավելին. հարցում
«Եվրատեսիլի» եզրափակիչն այս տարի դիտել են ռուսների մեկ երրորդից մի փոքր ավելին (35 տոկոսը), նրանց գրեթե կեսը (45 տոկոսը) համարում են Նորվեգիայի ներկայացուցիչ Ալեքսանդր Ռիբակի հաղթանակը արդարացված, վկայում են հինգշաբթի հրապարակված Հասարակական կարծիքի ուսումնասիրման համառուսական կենտրոնի հարցման արդյունքները, հաղորդում է «ՌԻԱ Նովոստին»։
«Եվրատեսիլի» հեռարձակումն ավելի քիչ թվով ռուսներ են դիտել, քան սպասվում էր. նախապես մրցույթին պատրաստվում էր հետևել հարցվածների գրեթե կեսը (47 տոկոս)։ Հանդիսատեսը, որպես կանոն, մոսկվացիներն ու պետերբուրգցիները (48 տոկոս), կանայք (40 տոկոս) և 18-24 տարեկան հարցվածներն (51 տոկոս) էին։ Ռուսաստանցիների գրեթե երկու երրորդը (64 տոկոս) չեն դիտել «Եվրատեսիլի» եզրափակիչը. որպես կանոն, դրանք խոշոր քաղաքների բնակիչներ են (72 տոկոս), տղամարդիկ (70 տոկոս) և տարեց հարցվածներ (72 տոկոս)։
Ռուսների ճնշող մեծամասնությունը (86 տոկոս) գիտեն, թե ով է հաղթել մրցույթում։ Նրանցից 67 տոկոսը ճիշտ են նշում հաղթողի անունը (Ալքեսանդր Ռիբակ), 14 տոկոսը միայն գիտեն, որ հաղթել է նորվեգացի կատարող, իսկ 2 տոկոսը, որ հաղթողը ծագումով բելառուսցի է։ Վերջապես, հարցվածների 1 տոկոսը վստահ են, որ մրցույթում հաղթել է Ռուսաստանի ներկայացուցչուհի Անաստասիա Պրիխոդկոն։ Հարցվածների 14 տոկոսը չգիտեն, թե ով է դարձել «Եվրատեսիլ-2009» հաղթողը։
Ամենից շատ ռուսներին դուր է եկել Ռիբակի ելույթը (45 տոկոս)։ Պրիխոդկոյի երգը հավանել են հարցվածների 15 տոկոսը։ Յուրաքանչյուր տասներորդ հարցվածը նշել է, որ իրենց վրա տպավորություն է թողել Ադրբեջանի մասնակիցների ելույթը։ Եվրոպայի երկրների ներկայացուցիչները ռուսներին ամենաքիչն են դուր եկել. 4-ական տոկոսը նշում են Թուրքիան և Ֆրանսիան, 3 տոկոսը՝ Մեծ Բրիտանիան, 2-ական տոկոսը՝ Հունաստանը, Ուկրաինան, Հայաստանը, Էստոնիան։ Շոուն ընդհանուր առմամբ դուր է եկել միայն հարցվածների 1 տոկոսին, 14 տոկոսը, ընդհակառակը, նշել են, որ մասնակիցներից ոչ ոք իրենց վրա տպավորություն չի գործել։
Այն ռուսներն, ովքեր դիտել են մրցույթի եզրափակիչը, որպես կանոն, ընկալում են «Եվրատեսիլը» որպես Ռուսաստանում առկա դրականը Եվրոպային ցուցադրելու հնարավորություն (65 տոկոս)։ Հակառակը, նրանք, ովքեր հետևել են հեռարձակմանը, հայտարարում են, որ նման մեծ ծախսերն այս միջոցառման անցկացման համար ճգնաժամի պայմաններում բոլորովին արդարացված չեն (45 տոկոս)։
ՀԿՈՒՄԿ համառուսական հարցումն անցկացվել է մայիսի 23-24-ը։ Հարցվել է 1,6 հազար մարդ Ռուսաստանի 140 բնակավայրերում, շրջաններում և հանրապետություններում։ Վիճակագրական անճշտությունը չի գերազանցում 3,4 տոկոսը։ Հարցվածներին առաջարկվել է տալ պատասխանի մեկ կամ մի քանի տարբերակ։ -0-
