Մոսկվայում գրասենյակային տարածքների պահանջարկը հասել է 2002թ.-ի մակարդակին. փորձագետ
2009թ.-ի առաջին եռամսյակի արդյունքներով՝ Մոսկվայում գրասենյակային տարածքների պահանջարկը ճգնաժամի պատճառով հասել է 2002թ.-ի մակարդակին, չորեքշաբթի «ՌԻԱ Նովոստիին» է տեղեկացրել Cushman&Wakefield Stiles&Riabokobylko (C&W/S&R) ընկերության ուսումնասիրությունների բաժնի ղեկավար Դենիս Սոկոլովը։
Մասնավորապես, նրա խոսքերով, 2009թ.-ի առաջին եռամսյակի ընթացքում Մոսկվայում վարձակալվել և գնվել է գրասենյակային տարածքների ավելի քան 100 հազար քառակուսի մետր։
«Նման ցածր պահանջարկ վերջին անգամ նկատվել է 2002թ.-ին», - ընդգծել է նա։
Ինչպես ավելացրել է Սոկոլովը, նույնիսկ գների զգալի նվազեցումը չի ստիպում վարձակալներին պայմանագիր կնքել։
«Ուղիղ մեկ տարի առաջ՝ 2008թ.-ին, գրանցվել էր պահանջարկի ռեկորդային մակարդակ. 567 հազար քառակուսի մետր գրասենյակային տարածք վարձակալվել և գնվել է։ 2009թ.-ի առաջին եռամսյակում նախնական վարձակալության որևէ պայմանագիր չի կնքվել, գրասենյակային տարածքների վարձակալության վերաբերյալ գործարքների միջին չափը նվազել է (500 քառակուսի մետրից պակաս)», - ընդգծել է Սոկոլովը։
Փորձագետի տվյալներով, Մոսկվայում գրասենյակային տարածքի վարձակալման համար պահանջվող դրույքաչափերն առաջին եռամսյակի ընթացքում կրճատվել են 15-20 տոկոսով։
«Այժմ վարձակալության դրույքաչափերը գտնվում են А կարգի համար մեկ քառակուսի մետրի դիմաց 900 դոլարի և В կարգի համար 500 դոլարի սահմաններում։ Անհրաժեշտ է նշել, որ այս դրույքաչափերը դեռևս չեն հաստատել վարձակալների սպասումները։ Ընդհանուր առմամբ 2008թ.-ի ամռանից դրույքաչափերը նվազել են 50 տոկոսով», - ասել է նա։
Նրա կանխատեսումներով, մինչև 2009թ.-ի ամառ ակնկալվում է գրասենյակային տարածքների գների լրացուցիչ անկում 15-20 տոկոսի սահմաններում։
Ինչպես նշել է Սոկոլովը, չնայած ճգնաժամին՝ անշարժ գույքի գործակալները ստիպված էին ավարտին հասցնել կոմերցիոն անշարժ գույքի ոլորտի այն նախագծերը, որոնք գտնվում ենք իրագործման վերջնական փուլերում, ինչն առաջին եռամսյակում Մոսկվայում գրասենյակային տարածքների ռեկորդային ավելացման հանգեցրեց։
«Այսպես, 2009թ.-ի առաջին եռամսյակի ընթացքում Մոսկվայում կառուցվել են 721 հազար քառակուսի մետր որակյալ գրասենյակային տարածք։ 32 նոր շենքերից միայն երկուսն են համապատասխանում А կարգի պահանջներին», - նշել է փորձագետը։
Խոսելով կառուցված գրասենյակային համալիրների մասին՝ Սոկոլովը ընդգծել է, որ նոր տարածքների մեծ մասը՝ 62 տոկոսը, թափուր է և վարձով է տրվում։
«Նոր կառուցված տարածքների մնացած 38 տոկոսը վարձակալվել են նախնական պայմանագրերով մինչև ճգնաժամը, և այժմ դրանց կարգավիճակը դժվար է որոշել, քանի որ նման պայմանագրերը վերջին երկու եռամսյակի ընթացքում անկայուն են դրսևորում են ունեցել», - պարզաբանել է նա։-0-
