ԵԱՀԿ ԽՎ հատուկ ներկայացուցիչը Բաքվում կքննարկի ղարաբաղյան կարգավորումը
Լեռնային Ղարաբաղի հարցով ԵԱՀԿ Խորհրդարանական վեհաժողովի (ԵԱՀԿ ԽՎ) հատուկ ներկայացուցիչ Գորան Լենմարկերը հինգշաբթի երկօրյա այցով կմեկնի Ադրբեջան՝ Հարավային Կովկաս ունեցած այցի շրջանակներում, «ՌԻԱ Նովոստիին» տեղեկացրել է Բաքվում ԵԱՀԿ գրասենյակի ներկայացուցիչը։
Այցի նպատակը ղարաբաղյան հակամարտության կարգավորման բանակցային գործընթացի ներկա իրավիճակի հետ ծանոթանալն է՝ Վիեննայում կայանալիք ԵԱՀԿ ԽՎ ձմեռային նստաշրջանի ժամանակ միջանկյալ զեկույց ներկայացնելու նպատակով։
Ծրագրվում է, որ Լենմարկերը կհանդիպի Ադրբեջանի նախագահ Իլհամ Ալիևի, Ադրբեջանի արտգործնախարար Էլմար Մամեդյարովի և խորհրդանի խոսնակ Օկտայ Ասադովի հետ։
Լենմարկերը Բաքու կմեկնի Թբիլիսիից։ Մինչ Վրաստանի մայրաքաղաք այցելելը՝ փետրվարի 9-10-ը Լենմարկերը գտնվում էր Երևանում։
Հայաստանի մայրաքաղաքում նա տեղական ԶԼՄ-ներին հայտարարել էր, որ ղարաբաղյան հակամարտությունը պետք է լուծել՝ ելնելով ԵԱՀԿ-ի համար հավասարարժեք ազգային ինքնորոշման իրավունքի և պետության տարածքային ամբողջականության սկզբունքներից։
Նրա կարծիքով, հակամարտությունը ռազմական լուծում չունի և լուծման համար երկու կողմերից էլ փոխզիջումներ է պահանջում։
Լենմարկերը կարևորել է նաև այն, որ Հայաստանի և Ադրբեջանի առաջնորդները պետք է իրենց վրա վերցնեն հակամարտության կարգավորման պատասխանատվությունը՝ նշելով, որ հակամարտության կարգավորման հնարավորությունը մի քանի անգամ բաց է թողնվել, և «որքան մենք ժամանակ ենք ձգձգում, այնքան ավելի վատ է բոլորի, առաջին հերթին՝ Լեռնային Ղարաբաղի ժողովրդի համար»։
Նա ընդգծել է նաև, որ հակամարտության կարգավորման գործընթացը պետք է ընթանա ԵԱՀԿ Մինսկի խմբի մասնակցությամբ։
Ղարաբաղյան հակամարտությունը սկիզբ է առել 1988 թ.-ին, երբ հիմնականում հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին։ 1991 թ. դեկտեմբերի 10-ին, Խորհրդային Միության փլուզումից մի քանի օր առաջ, Լեռնային Ղարաբաղում տեղի ունեցավ հանրաքվե, որի ժամանակ բնակչության ճնշող մեծամասնությունը՝ 99,89 տոկոսը Ադրբեջանից ամբողջովին անկախանալու կողմ քվեարկեց։ Դրանից հետո սկսվեցին լայնամասշտաբ ռազմական գործողություններ, որոնց հետևանքով Ադրբեջանը կորցրեց վերահսկողությունը Լեռնային Ղարաբաղի և նրան հարակից յոթ շրջանների նկատմամբ։
1994 թ.-ի մայիսի 12-ին՝ զինադադարի մասին համաձայնագրի ուժի մեջ մտնելուց հետո հակամարտության գոտում դադարեցին ռազմական գործողությունները։ 1992 թ.-ից մինչ օրս ընթանում են բանակցություններ հակամարտության խաղաղ կարգավորման ուղղությամբ ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան։-0-
